Регион
Луѓето излегуваат на улиците во градот каде трикратен убиец уби жена и го пренесуваше тоа на социјални медиуми

Во Градачац од денеска е тридневна жалост, откако трикратниот убиец Нермин Сулејмановиќ вчера брутално ја уби својата невенчана сопруга Низама Хеќимовиќ и уште две лица.
Хеќимовиќ неодамна го напуштила откако неколку пати го пријавувала за насилство и се криела од него кај нејзината тетка. Но, тој оттаму ја киднапирал, ја однел на друга локација и ја убил пред очите на бебето. Сето тоа го пренесуваше се во живо на Инстаграм.
Тој ги уби и Ондер Џенгис и неговиот син Денис во центарот на Градачац. Рани уште три лица, меѓу кои ќерката и сестрата на убиените татко и син, братучедот на убиената Низама и еден полицаец.
Одлуката за тридневната жалост во Градачац е донесена вчера на седницата на колегиумот на градскиот совет.
Овие брутални убиства ја шокираа јавноста во БиХ и регионот.
Поради тоа што Сулејмановиќ прво брутално ја претепал својата невенчана сопруга Низама, а потоа ја снимал облеана во крв и со бројни повреди, а потоа ладнокрвно ја застрела во главата, денеска во Градачац ќе се одржат протести.
Најавени се за 12 часот.
„Ги повикуваме нашите сограѓани да дојдат на плоштадот Алија Изетбеговиќ во 12 часот и да се приклучат на нашиот спонтан собир со цел да се осуди секој облик на насилство – изјави вчера Нерма Шариќ за порталот Дневно аваз.
Да потсетиме, Низама Хеќимовиќ најмалку двапати го пријавила убиецот за насилство, последен пат четири дена пред убиството. Но, тогаш судот одби да му забрани на убиецот да ѝ се приближи на жртвата.
И во Босна и Херцеговина се прашуваат зошто компанијата сопственик на Инстаграм, Мета, со часови не ги отстрануваше видеата од убиствата кои за тоа време достапни на Инстаграм. И таа страшна снимка и уште една на која убиецот зборува во живо по убиствата беа достапни на Инстаграм сè до реакцијата на полицијата на БиХ, кога профилот на трикратниот убиец заедно со видеата конечно беше отстранет од оваа социјална мрежа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Суштината на обоената револуција е Србија да биде најслаба во регионот, а јас да клекнам пред сите

Српскиот претседател Александар Вучиќ денес изјави дека суштината на обоената револуција е дека Србија мора да биде послаба во споредба со сите во регионот, како и тоа тој да биде неспособен претседател, кој би клекнал пред сите што не ѝ посакуваат добро на Србија, пренесуваат медиумите во соседството.
„Тоа е суштината на обоената револуција. Србија мора да биде скромна и секогаш мора да биде послаба од Хрватска и од сите други во регионот за да може да бидат задоволни“, рече Вучиќ во Палатата на Србија одговарајќи на новинарско прашање.
Вучиќ рече дека денес не е случај Србија да е најслаба во регионот, иако е посиромашна од другите, туку дека, од друга страна, напредува побргу од другите, што никому не му одговара.
„Тоа е една од причините зошто го прават тоа бидејќи би сакале да имаат некомпетентен претседател, кој би клекнал на колена пред сите оние што не ѝ посакуваат добро на Србија“, рече Вучиќ.
Тој ги обвини луѓето, за кои тврди дека се водачи на блокади, дека ја мразат Србија и ѝ посакуваат најлошо на својата земја наведувајќи дека поради нив, земјата е во тешка ситуација бидејќи „ја намалиле стапката на раст, го уништиле туризмот, како и многу економски гранки“.
„Дури и меѓу блокадите има такви што ја сакаат Србија, но не може да се одвојат од овие водачи – новинари, професори и политичари. Тоа е еден од проблемите“, рече Вучиќ, пренесува „Бета“.
Регион
Поради силни ветрови, во прекин фериботскиот сообраќај во Грција

Фериботскиот сообраќај во Егејското Море во Грција денес беше прекинат поради силни ветрови, кои достигнаа брзина од 60 километри на час, поради што илјадници туристи не можеа да одат до своите планирани дестинации.
Забраната за пловидба, која ќе биде во сила денес најмалку до 13 часот по локално време, важи во сите поголеми пристаништа во Атика, а само фериботите на неколку линии во областа Аргосароникос сè уште пловат, објавува „Јуроњуз“.
Пристанишните власти чекаат ветерот да стивне за да може да се укине забраната за пловидба.
Пловењето кон островите Киклади беше прекинато во пристаништето Рафина иако екскурзиите до Мармарис на островот Кос продолжија според планот.
Фериботите не сообраќаат од Пиреја, а пловидбата во пристаништето Лаврио е прекината во правец на Китнос и Агиос Маринас и Неа Стира.
Илјадници патници не можеа да го почнат своето патување утрово поради прекин на пловидбата и чекаат да одат на своите дестинации.
Грчката крајбрежна стража им советува на патниците да се консултираат со компанијата чиј ферибот треба да ги превезува кога ќе бидат можни нови поаѓања, како и да ги избегнуваат пристаништата на кои се појавил сообраќаен метеж.
Метеоролошката служба прогнозира дека силните ветрови ќе траат најмалку до недела, што би можело да влијае на фериботскиот сообраќај.
Поради оваа причина, властите им препорачаа на туристите да стапат во контакт со локалните пристанишни власти и компании пред да заминат.
Регион
Гори во Грција: издадена наредба за итна евакуација

Голем шумски пожар избувна денес во областа Каравадос на грчкиот остров Кефалонија, а издадена е наредба за евакуација на три области, јавуваат грчките медиуми.
Пожарот избувнал во земјоделска и шумска зона, а ангажирани биле 20 припадници на противпожарната служба со седум возила, како и членови на планинската спасувачка служба и волонтери, објави „Катимерини“.
„Доколку се наоѓате во областите Каравадос, Доризата и Керамис, засолнете се и упатете се во правец на Аргостоли. Следете ги упатствата на властите“, се наведува во известувањето на противпожарната служба.
Четири авиони и два хеликоптера исто така помагаат во гаснењето на пожарот, пишува грчкиот весник.
Фото: принтскрин