Регион
Милановиќ: Влезот на Финска во НАТО е опасно шарлатанство

Хрватскиот претседател Зоран Милановиќ изјави дека Финска и Шведска не може да влезат во НАТО додека не се смени изборниот закон во БиХ.
„Хрватскиот парламент не смее да ратификува ничиј пристап кон НАТО додека не се смени изборниот закон во БиХ“, нагласи тој.
Милановиќ им рече на новинарите дека може да се разговара за влезот на Финска и Шведска во НАТО, но смета дека тоа е многу опасна авантура. Финска и Шведска заеднички ќе изразат желба за влез во НАТО во мај, објавија вчера финскиот весник „Илталехти“ и шведскиот весник „Експресен“ повикувајќи се на извори блиски до ова прашање.
И покрај поблиската соработка со воената алијанса кога Русија го анектира Крим, скандинавските земји решија да останат неутрални во тоа време, но неодамнешната руска инвазија на Украина предизвика остра пресвртница кај нив. Милановиќ потсети дека не може формално да одлучува за формален влез на тие земји во НАТО, но тоа го смета за многу опасно шарлатанство.
„Што се однесува до мене, нека влезат во НАТО, нека ѝ забодат нож на бесната мечка во очи. Но, додека не се реши прашањето за изборниот закон во БиХ, додека Американците, Англичаните, Германците, ако може и ако сакаат, не ги принудат сараевчани и Бакир Изетбеговиќ да го сменат изборниот закон во следните шест месеци и да не им дадат основни права на Хрватите, парламентот не смее да ратификува ничиј прием во НАТО“, рече хрватскиот претседател.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Шест месеци по падот на настрешницата, собир на граѓаните во Нови Сад

Денеска во Нови Сад се навршуваат шест месеци од падот на настрешницата на влезот на железничката станица, кога 16 лица загинаа, а едно е тешко повредено и се уште е во болница.
Студентите во блокадата на Универзитетот во Нови Сад ги повикаа граѓаните да се соберат пред станицата за во 11:52 часот да им се оддаде почит на жртвите.
„Не ги забораваме жртвите од падот на настрешницата во Нови Сад. Тој настан, кој е резултат на невнимание, неодговорност и институционална негрижа, однесе животи и ги остави семејствата и заедницата во болка и со прашања на кои се уште не се одговорени“, велат новосадските студенти.
Откако ќе оддадат почит, насобраните во колона ќе тргнат по булеварот Ослободување до Мостот на слободата, кој ќе биде блокиран неколку часа.
Регион
Уапсен шпион во Грција, осомничен за поврзаност со Русите

Етнички Грк од Грузија е уапсен во Александрополи, североисточна Грција, под обвинение за шпионажа, откако властите пронашле фотографии и видеа од воени објекти и опрема на неговиот мобилен телефон, пишува грчки Екатимерини.
Според грчката полиција, осомничениот испратил чувствителни материјали на неидентификуван примач во странство користејќи шифрирана апликација за комуникација. Според грчките медиуми, постои сомневање дека мажот фотографирал, снимал и дистрибуирал материјали од воено значење најмалку шест месеци.
Апсењето е извршено за време на заедничка операција на Националната разузнавачка служба (ЕЈП) и Одделот за криминалистичка истрага и гонење во Александрополи.
При прелиминарниот распит, осомничениот, наводно, признал дека фотографирал и снимал воени локации за друго лице. Според државната телевизија ЕРТ, властите веруваат дека мисијата можеби вклучувала планови за можна саботажа на воени објекти.
Лицето кое го регрутирало осомничениот е наводно член на меѓународна криминална мрежа и поврзан со руската воена разузнавачка служба ГРУ. Човекот признал дека првично му била понудена парична отштета, но на крајот постапил доброволно „за мајка Русија“. Тој, наводно, им рекол на истражителите дека во младоста служел во руската армија во Сибир.
Националната разузнавачка служба ја продолжува истрагата за да го утврди целосниот обем на операцијата, заклучува Екатимерини.
Регион
Во Белград најдено телото на девојчето кое неговата мајка го фрли во река во Загреб

Белградскиот Интерпол ја известил хрватската полиција дека во март во реката Сава во Белград пронашла тело на дете.
Загрепската полиција штотуку соопшти дека преку меѓународна полициска соработка е извршена ДНК анализа и е утврдено дека е жртвата на убиството, извршено на 15 јануари годинава во Загреб, кај мостот Јанкомир.
Станува збор за случај од почетокот на годинава кога ХГСС и други служби трагаа по тригодишно девојче кое мајка и го внела во реката кај мостот Јанкомир.
Мајката тие денови била сослушана во Жупаниското државно обвинителство во Загреб, а поради извршување на кривичното дело тешко убиство и е изречена едномесечен притвор.