Регион
Мисли дека е лидер на „Голема Албанија“, Курти покажа дека сонува за повеќе од независност на Косово, вели српски дипломат
Посетата на косовскит премиер Албин Курти на Скопје и Тетово, беше тема на анализа на српскиот дипломат Зоран Миливојевиќ.
Тој за Блиц посочува дека Курти ја спроведува својата и политичката платформа на неговото движење Самоопределување.
„Во основата на таа платформа е идејата за голема Албанија. Тоа е неговото кредо. Во таа смисла, во Северна Македонија се сретна само со опозициските партии со кои ги дели истите идеолошки ставови. Не треба да заборавиме дека Курти има своја партија во Албанија, со која учествуваше и на локалните и парламентарните избори, на кои не се снајде баш најдобро“, потсетува Миливојевиќ.
Како што вели, откако стана премиер, Курти „работи на промовирање на концептот за голема Албанија“.
„Преименувањето на улицата Скопје во Адем Демачи е симбол на посетата на Курти на Северна Македонија. Интересно е што досега нема реакција од Западот за оваа посета, иако таа влијаеше на целиот регион на Западен Балкан. Мислам дека Западот нема да реагира бидејќи Албанците се најверните сојузници на Западот кога станува збор за стратегијата за сузбивање на влијанието на Русија и Кина на Западен Балкан“, оценува Миливојевиќ.
Миливојевиќ смета дека посетата на Курти во Тетово го доведува во прашање пристапот кон деескалација во регионот.
„До тој степен што нема реакција од Западот на оваа посета, ќе има ново зголемување на тензиите. Курти прави две работи со својата политика. Прво, ја спроведува големоалбанската идеја и второ, влијае на безбедноста на целиот регион. Само оние кои ја спонзорираат државноста на Косово можат да го спречат од тоа, а тоа се западните центри на моќ“, заклучува Миливојевиќ.
Од друга страна, Фатмир Шехоли, директор на Институтот за афирмација на меѓуетничките односи, „фрла поинакво светло“ на посетата на Курти на Северна Македонија.
„Курти не ги посети Скопје и Тетово во својство на премиер, туку како обичен граѓанин на Косово. Албин Курти не е премиер на сите Албанци. Истакнувањето на албанските симболи е регулирано со македонскиот закон и устав, така што јас не гледам никаков проблем во тоа. Верувам дека пораките на Курти не само во „Скопје и Тетово треба да бидат во духот на европските трендови, и би сакал Курти да ја посети Прешевската долина во Србија и да испрати пораки за мир, стабилизација и создавање на еднаквост за сите граѓани, без разлика на етничката и верската припадност“, вели Шехоли.
Како што вели тој, владата на Курти се соочува со бројни корупциски скандали на Косово.
„Тие афери не можат да се прикријат со обиди да се дадат изјави кои немаат никакво значење, затоа секоја недела стигнуваат оставки од неговата влада“, вели Шехоли.
Кога виде што донесе неговата посета на Тетово и Скопје, Курти се обиде да се претстави како „наивен миротворец“.
„Република Северна Македонија ја сметам за партнер, сојузник и пријател. Таа има за цел европска интеграција како нас, таа е и членка на НАТО, а тука го имаме и НАТО. Тоа покажува дека нашите односи се одлични“, рече Курти.
Како што тврди, средбите со градоначалниците на Тетово и на Чаир нема да наштетат никому.
„Средбите не беа одржани како средби и собири против никого. Со добри односи меѓу нас никој нема да настрада. Други изјави не коментирам, но секогаш сме изразувале волја за соработка“, додаде Курти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Опсадна состојба во училиште во Загреб: наставничка се заклучила во училницата со учениците поради деветгодишното дете и неговите родители
Во едно основно училиште во центарот на Загреб утрово имало опсадна состојба поради што интервенирала дури и полицијата.
Наставничката се заклучила во училницата со учениците бидејќи родителите на едно 9-годишно момче барале тој да влезе во училницата, иако пред два месеца бил отстранет од час поради обвинувања за врсничко насилство од страна на врсниците и нивните родители.
Бидејќи родителите постапувале агресивно, наставничката се плашела за нивната и за сопствената безбедност.
„За среќа, наставничката беше присебна и ѝ благодариме за храброста. Таа се заклучи во училницата со нашите деца и им кажа дека тоа е тест-вежба за кризна ситуација. Сите побрзавме во училиштето и сме во шок. Ова е страшно, низ што поминуваме и децата и ние со месеци“, вели мајката на еден ученик за „Јутарњи лист“.
Кога стигнала на училиште, како што додава соговорничката на „Јутарњи лист“, заедно со другите родители седнале со момчето пред одделението и инсистирале да влезат во училницата.
Рекоа дека им е преку глава од тоа што нивното дете не оди нормално на училиште со другите.
Според написите, тој бил сместен во библиотеката и наставата ја следел онлајн на компјутер, а секогаш бил придружуван од професорка. Момчето секогаш било придружувано од возрасен и не јадело во исто време со учениците од неговото одделение, но децата не се осмелиле да влезат во библиотеката.
Секојдневно ги навредувал своите врсници од класот, малтретирал и сексуално вознемирувал девојчиња и ги снимал со својот мобилен телефон. Истото тоа им го направил и на момчињата удирајќи ги силно по грбот и во неколку наврати со тупаници по главата. Често им се заканувал дека ќе ги убие нивните родители.
Како што пренесува медиумот, фрлил помало момче во воздухот, па дури и турнал еден врсник толку силно што со главата удрил во работ од масата и добил модринка под окото.
Ова биле некои од инцидентите што се случиле во училиштето од ноември минатата година за време на наставата или за време на паузата, а кои ги раскажуваат родителите на учениците.
Исто така, момчето редовно ја прекинувало наставата со викање, лаење или мјаукање.
Наставничката со месеци не го користела одморот и не излегувала од училницата бидејќи знаела дека децата не се безбедни.
Регион
„Секој треба да си го сработи својот дел“: порака од самитот на лидерите од регионот и ЕУ
Планот за раст на Западен Балкан претставува јасен сигнал за посветеноста на Европската Унија за економска и демократска трансформација на Западен Балкан, изјави премиерот на Црна Гора, Милојко Спаиќ, на самитот на лидерите на Западен Балкан и Европската Унија во Котор.
Советот на ЕУ одобри план од шест милијарди евра за поддршка на земјите од Западен Балкан со цел да се забрзаат реформите и економскиот раст, од кои две милијарди грантови и четири поволни заеми гарантирани од ЕУ.
На самитот, покрај лидерите од регионот, учествуваат и европскиот комесар за соседство и проширување, Оливер Вархељ, и помошник-државниот секретар на САД за Европа и евроазија, Џејмс О’Брајан.
О’Брајан рече дека приоритет на планот за раст за Западен Балкан е да се создаде единствен пазар на циркулација на пари, да се намалат трошоците, да се олесни движењето на пазарот и да се отворат повеќе работни места.
„Пораките на планот се дека за секој учесник пораката е јасна – сработете ја вашата работа и не барајте некој друг да направи нешто за вие да го направите вашето“.
Вархељ рече дека планот за раст повеќе не е нацрт, туку патоказ, кој е корисен за регионот пред влезот во ЕУ:
„Поради планот за раст и интензитетот на помошта од економскиот и инвестицискиот план, реформската агенда и дополнителната финансиска помош до 2027 година, Балканот ќе биде подготвен или би можел да биде подготвен за влез во ЕУ“.
Претседателката на Советот на министрите на Босна и Херцеговина, Борјана Кришто, рече дека земјата договорила 110 реформи од 113 првично предложени од ЕУ.
„Европскиот пат е главната надворешнополитичка цел за која постои консензус во Босна и Херцеговина“, рече Кришто.
Косовскиот премиер Аљбин Курти ја потврди посветеноста на реформите што треба да се спроведат за да се спроведе планот.
Тој ја повика Србија да ги гони одговорните за случајот со вооружениот напад во Бањска, кој косовските институции го сметаат за терористички.
Албанскиот премиер Еди Рама ја истакна важноста на регионалната соработка на патот кон Европската Унија.
„Време е регионот да стане дел од европскиот дигитален паричник. Поединечно, сите се вклучивме и имаме намера да бидеме подготвени до 2027 година“.
Тој ја нагласи соработката во областа на миграцијата, трговијата со луѓе, „не само меѓу регионите, туку и меѓу регионите и ЕУ“.
Српскиот претседател Александар Вучиќ изјави дека планот за раст ќе донесе добри резултати во регионот:
„Ги цениме и сме благодарни за парите, но поважни од парите се структурните реформи што треба да ги спроведеме и тоа многу го цениме.
Тој рече дека е убеден оти земјите од регионот нема да влезат во ЕУ пред Украина.
„Мојата интелигенција ми вели дека така ќе биде. Знам дека ЕУ е многу популарна во вашите земји. Но, не толку многу во мојата“.
Премиерот на Северна Македонија, Талат Џафери, потврди дека се посветени на европските реформи оценувајќи дека за успех на формирањето на заедничкиот пазар неопходно е деблокирање на Централноевропскиот договор за слободна трговија.
Самитот се организира со слоганот „Еден регион, заедничка визија“.
Регион
„Не можам да ги прифатам овие пари“: Бејби Лазања ја одби владината награда
Премиерот Андреј Пленковиќ денеска објави дека на владина седница е одлучено Марко Пуришиќ, попознат како Бејби Лазања, кој земјата ја претставуваше на годинешната Евровизија, да добие парична награда од 50.000 евра. Но, тој нема да ја прифати.
Вели дека има многумина на кои тоа им треба повеќе одошто нему, а напиша и кому би сакал да му ги донираат парите.
„Ѝ благодарам на хрватската влада за паричната награда во износ од 50.000 евра. Сепак, не можам да ги прифатам тие пари. Би можел да дадам многу причини зошто, но првата, најважна и доволна е дека има многу други поединци и организации на кои овие пари ќе им помогнат многу повеќе“, напиша тој на „Инстаграм“.