Против проф. д-р Бранимир Несторовиќ, член на српскиот Кризен центар за борба против коронавирусот, е поднесено барање до Комисијата за етика на Лекарската комора на Србија (ЛКС).

Во барањето се наведува дека Несторовиќ со своите јавни настапи како член на Кризниот штаб за сузбивање на епидемијата на Ковид-19 го оштетил угледот и ѝ нанел штета на лекарската професија, како и на здравјето воопшто.

Иницијатор за поднесување на барањето е д-р Ѓорѓе Алемпиевиќ, редовен професор по судска медицина на Медицинскиот факултет во Белград, а него го поддржаа уште шест колеги и еден пензиониран лекар, пишува српски „Телеграф“.

Етичкиот комитет на ЛКС ќе расправа за барањето на група членови да се осуди јавно познатиот професор и пулмонолог за изјавите што ги давал како член на Кризниот штаб. Таа јавна осуда во краен случај може да значи дека на професорот Несторовиќ може да му биде одземено правото на работа.

Во изјава за српски „Телеграф“ професорот Несторовиќ вели:

„Сега кога епидемијата помина и се покажа дека сум во право за сè, испаднав најнеетички лекар во Србија затоа што бев на прес-конференција со Вучиќ“.

Несторовиќ додава дека разни интереси се преклопуваат таму и дека има суета, но, пред сè, политика, и најавува дека потписниците на барањето испратено до ЛКС, ако навистина направат нешто, ќе ги тужи на редовен суд.