Регион
(Видео) Објавен разговорот на машиновозачот од грчкиот воз на смртта: со 160 на час удрил во друг воз
Објавени се разговорите меѓу шефот на станицата во Лариса и машиновозачот на патничкиот воз „Интерсити 62“, кој во вторникот вечерта се судри со товарен воз. Во несреќата загинаа најмалку 43 лица, а повеќе од 80 се повредени.
Се верува дека стационарецот, без да знае за тоа, му дал на машиновозачот зелено светло да се престрои на друг дел од пругата по кој веќе сообраќал товарниот воз.
Машиновозачот не внимавал на црвеното светло пред себе бидејќи сигналниот систем не работел извесно време. Уште повеќе, како што велат извори од железницата, стационарецот не бил ни свесен дека возот излетал од шините, па не можел да ја поправи грешката во следните минути.
Како течеше разговорот меѓу машиновозачот и станицата
Машиновозачот: „Лариса, може ли да се слушнеме. Васили, да одам“?
Станицата: Оди, оди.
Возачот: Добро, пријатна вечер.
Станицата: Среќно.
Има и снимка од разговорот на стационарот и браварот, кој открива што се случило.
Браварот: Шефе, да го вратам?
Станицата: Не, не, нека оди така.
Браварот: Добро, ќе го оставам како што е, дијагонално.
Овој разговор открива дека работникот го прашал управникот на станицата дали треба да го врати прекинувачот за возот да се врати на првата пруга. Меѓутоа, тој добил инструкции дека локалниот воз ќе ја користи дијагоналната пруга.
Овие разговори се официјални и возачот немаше причина да се сомнева во наредбите на стационарецот бидејќи веруваше дека Лариса се слушнала со колегите на следната станица во Неи Пори и верувал дека патеката е слободна.
Има индиции дека во тој кобен вторник имало низа технички проблеми поради кои на моменти биле затворени делови од пругата.
„Интерсити“ тргна во 22.48 часот со задоцнување од 48 минути од железничката станица „Палеофарсало“, а на средбата на смртта со комерцијалниот воз пристигна неколку минути по 23 часот, пишува „Прототема“.

Шефот на станицата, откако првично тврдеше дека го заклучил возот на вистинската пруга, но, системот не го послушал, ја признал својата фатална грешка и се соочува со сериозно обвинение за убиство од небрежност.
Меѓуградскиот воз „62“ на релација Атина – Солун ја помина станицата кај Лариса нешто пред 23 часот во вторникот, со 341 патник и 13-член екипаж.

Неколку минути подоцна се случи трагедија. Имено, и покрај тоа што железничката линија Атина – Солун е двојна, возот со најмалку 350 луѓе директно се судрил со товарен воз, кој се движел во спротивна насока, при што првите три вагони излетале од шините и се запалиле.
Досега пожарникарите извлекле 43 тела, но властите веруваат дека конечниот биланс на загинати ќе биде поголем бидејќи 19 сè уште се водат за исчезнати.

Тоа се претежно ученици и студенти, кои по три дена одмор се враќаа во училиштата.
Во моментот на трагедијата се верува дека возот се движел со брзина од 160 километри на час, пренесе „Телеграф.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик му се заблагодари на Трамп
Поранешниот претседател на Република Српска, Милорад Додик, се огласи откако САД ги укинаа санкциите против него, заблагодарувајќи му се на американскиот претседател Доналд Трамп за исправката, како што тврди, на големата неправда. Тој ја нарече одлуката морална рехабилитација на вистината за Република Српска.
Во објава на социјалните мрежи, Додик му се заблагодари на американскиот претседател Доналд Трамп и неговите соработници за „исправката на големата неправда нанесена врз Република Српска, нејзините претставници и нивните семејства“, која, како што наведува, „ја создадоа администрациите на Обама и Бајден“.
„Одлуката за укинување на санкциите не е само правна, туку и морална рехабилитација на вистината за Република Српска и сите оние кои чесно ѝ служат. Уште еднаш се покажа дека сè што беше кажано против нас беше лага и пропаганда, врз која беше изграден големиот хаос што го создаде Кристијан Шмит – хаос што сега мора да се исчисти“, рече Додик.
Тој додаде дека може да им прости сè на оние кои се фалеле и верувале во туѓите лаги во изминатите години, „освен годините што ги изгубиле затоа што верувале дека Република Српска ќе падне“. „Денес е јасно – таа никогаш нема да падне“, рече Додик.
Фото: ЕПА
Регион
САД ги укинаа санкциите за Додик
САД одлучија да ги укинат санкциите за неколку лица од Република Српска, што е поврзано со неофицијален договор меѓу Милорад Додик и новата американска администрација.
Санкциите беа укинати за Милорад Додик, Жељка Цвијановиќ, семејството Додик, нивните компании и многу други блиски соработници.
Во петок, 17 октомври, САД ги укинаа санкциите за четворица блиски соработници на Додик, кои првично беа ставени на црната листа за организирање и промовирање на неуставниот „Ден на РС“. Тие се Јелена Пајиќ Баштинац, Данијела Драгичевиќ, Горан Раковиќ и Дијана Миланковиќ.
Неофицијални извори тврдат дека укинувањето на санкциите е резултат на договор меѓу САД и Додик, според кој Додик морал да ја напушти функцијата претседател на РС по конечната пресуда и да назначи вршител на должноста претседател.
Откако Ана Тришиќ-Бабиќ беше избрана за вршител на должноста претседател на Република Српска, со што се исполни тој дел од договорот, Америка постепено ги укинува санкциите за другите соработници на Додик, а тој процес треба да биде завршен до крајот на овој месец.
Регион
(Видео) Комбе излета од автопат во Србија: едно дете загина, седум повредени
Едно дете загина, а седум други се повредени, како и возачот на комбе, во тешка сообраќајна несреќа што се случи околу 3:30 часот наутро на автопатот Нови Сад-Белград, објавија регионалните медиуми во среда.
Детето родено во 2009 година почина на местото на настанот од повредите здобиени во несреќата, објави Радио телевизија Србија (РТС).
Седум други деца, родени помеѓу 2009 и 2012 година, се здобиле со тешки повреди и се пренесени во Детската болница во Нови Сад.
Возачот, исто така, е тешко повреден
Возачот на комбето, маж роден во 1982 година, исто така е тешко повреден и е пренесен во Ургентниот центар на Клиничкиот центар на Војводина.
Несреќата се случила кога комбето во кое се превезувале децата излетало од патот, пробило ограда и паднало во канал, објави Радио телевизија Војводина (РТВ).
фото: архива

