Регион
Остри зборови и жестоки критики од Белград по изборите во северно Косово
Вонредните локални избори што вчера се одржаа во четири општини со српско мнозинство на северот од Косово забележаа најмал одѕив досега во историјата на земјата од само 3,47 %, што предизвика остри зборови од српскиот претседател Александар Вучиќ и остри критики за ЕУ и САД од премиерката Ана Брнабиќ, пренесува „Еурактив“.
Од 45.000 косовски граѓани со право на глас во регионот, на вкупно 19 избирачки места што беа отворени во Северна Митровица, Зубин Поток, Звечан и Лепосавиќ, гласаа само 1.567 луѓе. од кои само 13 Срби, покажуваат податоците од косовската Централната изборна комисија (ЦИК).
Прелиминарните резултати покажуваат дека владејачкото движење Ветевендосје ги освои општините Северна Митровица и Лепосавиќ, а Демократската партија на Косово ги освои Звечан и Зубин Поток.
Вучиќ беше гласен во осудата на изборите уште пред отворањето на избирачките места најавувајќи во саботата дека Србите ќе ги бојкотираат изборите и дека гласањето ќе резултира со целосна инвазија од албански политичари на северот од Косово.
„Нашиот народ утре мирно, одговорно и со презир ќе ги гледа оние што доаѓаат од Јужна Митровица да гласаат за избор на ново раководство во Северна Митровица, Лепосавиќ, Звечан и Зубин Поток. Она што ќе се случи потоа ќе биде целосна инвазија за која граѓаните се веќе подготвени, тие се навикнати“, изјави Вучиќ за српскиот портал „Бета“.
Тој го критикува и ставот на ЕУ истакнувајќи дека не треба да се гласа пред формирањето на заедницата на српските општини, што е клучна точка на судир во тековниот дијалог меѓу Косово и Србија со посредство на ЕУ.
Премиерката Брнабиќ беше уште помалку одмерена во своите коментари нарекувајќи ги изборите шарада олеснета од Западот.
„Запомнете го овој ден. Ова е денот кога се легализира и легитимизира последното европско гето. Овие слики го прикажуваат во вистинско светло т.н. владеење на правото и вистинското значење на демократските избори на Косово и Метохија поддржани од ЕУ и Квинтата“, напиша Брнабиќ на „Твитер“ како реакција на изборите.
Таа додаде дека изборите не може да се сметаат за слободни и фер бидејќи се одржаа во привремени контејнери под директен надзор на косовските вооружените сили.
„Избори – слободни и фер, со вооружени сили и оклопни возила! Ова е Европа во 21 век. Гордејте се! Прославете ги вашите достигнувања денес. Уживајте во славата на она што сте го создале“, саркастично истакна Брнабиќ додавајќи дека изборите се дело на креаторите на Република Косово, кои ги нарече лицемери.
Пред гласањето во неделата, ЕУ го изрази своето разочарување од бојкотот на изборите од Српската листа, која има поддршка од официјален Белград, и порача дека Србите мора да се вратат во институциите во Косово.
„ЕУ, заедно со нашите партнери, се ангажира со двете страни да ги намали тензиите и косовските Срби да ја исполнат својата обврска од дијалогот и да се вратат во институциите, а Косово да овозможи ова враќање да се реализира. Досега е постигнат мал напредок во оваа точка. Императив е да се вратиме на ситуацијата во која косовските Срби активно учествуваат во локалната власт, полицијата и судството во северно Косово“, истакна портпаролот на ЕУ, Петер Стано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Во Будва уловена сина ајкула тешка 200 килограми
Сина ајкула долга повеќе од три метри и тешка 200 килограми е уловена во Будва.
Уловите на сина ајкула од минатите години покажуваат дека овој вид ајкула најчесто се среќава во Јадранското Море на пролет.
Рајко Бојановиќ, член на спортскиот риболов клуб „Ширун“, улови ајкула и рече дека ќе биде препарирана во Природонаучниот музеј на Црна Гора, а изложбата е планирана за септември.
Регион
Убиство и самоубиство во Бјеловар, Хрватска
Во Бјеловар, Хрватска во семејна куќа се пронајдени две починати и едно тешко повредено лице, кое е префрлено во болница. Најверојатно се работи за насилна смрт, а според неофицијални информации, мажот ја убил мајката на неговата жена, а се обидел да ја убие и сопругата која е тешко повредена.
Напаѓачот, според првичните инфрормации се самоубил.
Хрватската полиција засега не ги потврдува неофицијалните информации дека се работи за убиство и самоубиство.
Полицијата дојавата ја добила околу 10 часот, а на местото се врши увид.
Регион
Пленковиќ, хрватскиот премиер кој доби трет мандат најави прва седница за понеделник
Откако хрватскиот Сабор вчера ја поддржа 16. Влада на Република Хрватска, а третата предводена од лидерот на Хрватската демократска заедница (ХДЗ) Андреј Пленковиќ, тој во изјава за медиумите рече дека првата седница на новата Влада ќе биде во понеделник и најави продолжување на посветената работа во интерес на хрватскиот народ.
„Благодарам на мнозинството во хрватскиот Сабор што ни ја укажа довербата да станеме Влада на Република Хрватска по трет пат и ние, како што правевме претходните осум години, посветено ќе работиме во интерес на хрватскиот народ, сите наши сограѓани, економијата, врската меѓу татковината и иселениците Хрвати и да спроведеме програма врз основа на која ја добивме довербата на хрватските гласачи“, рече Пленковиќ откако Собранието гласаше за неговата трета Влада
Тој им се заблагодари на сите партнери кои ја поддржаа Владата.
Пратениците во хрватскиот Сабор вчера гласаа за доверба на новата влада на премиерот Андреј Пленковиќ.
За доверба на Владата гласаа 79 пратеници, против беа 61 пратеник, а еден беше воздржан.