Регион
Романија: Можен пресврт во врска со ублажувањето на законот за корупција

Лидерот на романската владејачка Социјалдемократска партија (PSD) Ливиу Драгнеа во обидите да ги сопре масовните протести кои речиси цела седмица се одржуваат ширум земјата, во саботата навести дека можеби би бил повлечен контроверзниот закон со кој се ублажуваат антикорупциските кривични закони.
„Можеби ќе разговараме за повлекување (на уредбата)“, изјави премиерот Ливиу Драгнеа за DC News.
Истовремено во саботата илјадници демонстранти се собраа во Букурешт и повторно да протестираат против мерката, којашто ја донесе владата под водство на социјалдемократите кои по една годна на 4-ти јануари се вратија на власта.
Според најавите, протестите кои собираат стотици илјади демонстранти ширум земјата, ќе се одржуваат и следната седмица.
Меѓутоа, и бидејќи владините приврзаници најавуваат против собир, Драгнеа изјави дека сака да ја избегне експлозивната ситуација.
Владата на Романија ја прифати уредбата во вторникот вечерта, којашто би се однесувала на тековните истраги и судења, како и на новите случаи. Криминалната негрижа повеќе не би била кривично дело, а дефиницијата на судирот на интересите е стеснета, така што, на пример, криминалот кој би се случил на меѓу членови на исто семејство.
Доколку биде спроведена, како што е планирано во рок од десет дена, уредбата ќе овозможи, меѓу другото, и декриминализација на злоупотребата на службените овластувања во кои сумите не минуваат над 200.000 леи, или 48.000 долари.
Со тоа би се прекинала тековната постапка против претседателот на Социјалдемократската партија, Ливиу Драгнеа, обвинет дека го користел политичкото влијание за да обезбеди плати за две лица кои работеле во штабот на неговата партија во периодот од 2006 до 2013 година. Нему му беше забрането да ја преземе должноста премиер по изборите во декември, поради можноста да биде осуден во судскиот спор поради корупција.
Меѓутоа, и десетици други политички функционери од сите политички партии во Романија би требало да имаат полза од оваа владина уредба.
Уставниот суд на Романија во меѓувреме примил три петиции со барање да ја преиспита законитоста на уредбата којашто, исто таа, беше критикувана и од Европската унија и од САД./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Русија ѝ се заблагодарува на Србија за донацијата од речиси 6 милиони долари: „Посебна симболика“

Според соопштението на руското Министерство за надворешни работи, Србија обезбедила „финансиска хуманитарна помош во вредност од 472 милиони рубли (околу 5,8 милиони американски долари)“ за регионот Курск.
Руското министерство во соопштението наведува дека, според нивните тврдења, српската влада го доделила наведениот износ како хуманитарна помош.
„Средствата се исплатени на Фондот за развој на регионот Курск, кој спроведува проекти за поддршка на најранливите групи на населението погодени од криминалните активности на режимот во Киев“, се вели во соопштението на министерството.
Москва ѝ се заблагодари на „пријателска Србија“ за „вниманието и сочувството, грижата за судбината на руските граѓани“, истакнувајќи дека овој чин носи „посебна симболика што го одразува вековното братство и блиските врски на двете земји и народи“.
Досега, официјален Белград не потврди дека е испратена каква било помош во Русија.
Србија претходно ѝ обезбеди хуманитарна помош на Украина, вклучително и откако Русија ја сруши хидроелектричната брана Каховка.
Српскиот претседател, Александар Вучиќ, исто така, изјави дека неговата земја е подготвена да учествува во обновата на еден или два украински региони.
Фото: ЕПА
Регион
Унгарскиот MOL го презема снабдувањето со нафта во Србија по санкциите на САД

Унгарската нафтена компанија MOL ќе ги зголеми испораките во Србија по санкциите на САД врз рафинеријата NIS, изјави денес унгарскиот министер за надворешни работи Петер Сијарто.
„Бидејќи MOL игра важна улога во снабдувањето на Србија со сурова нафта и гориво… нашите српски пријатели можат да се потпрат на зголемени испораки од MOL“, рече Сијарто, додавајќи дека ова зголемување нема да може целосно да го компензира недостатокот на испораки од Хрватска.
Нафтената индустрија на Србија (NIS), која е во мнозинска сопственост на Русија, не доби ново одложување на санкциите на Вашингтон воведени врз рускиот енергетски сектор. Во август, Канцеларијата за контрола на странски средства (OFAC) на Министерството за финансии на САД ја продолжи својата лиценца за испораки на сурова нафта до NIS до 29 септември, а потоа повторно до 8 октомври.
Јадранскиот гасовод (Јанаф), кој транспортира нафта до рафинеријата во Панчево, главниот снабдувач на нафтени производи на српскиот пазар, објави во среда дека добил лиценца што му овозможува да учествува во активности што се вообичаени и неопходни за транспорт на нафта до 15 октомври оваа година, со цел да ги заврши сите активности преземени според тековниот договор за транспорт на сурова нафта.
Јанаф, кој испорачува помеѓу два и три милиони тони нафта и генерира околу 40 милиони евра приходи, минатата година потпиша договор со NIS за транспорт на 10 милиони тони нафта до крајот на следната година.
Спроведувањето на санкциите, воведени во јануари, досега е одложувано осум пати. Санкциите врз српската нафтена индустрија се дел од казнениот пакет санкции на Соединетите Американски Држави против рускиот енергетски сектор, а НИС е под лупа на американските санкции од почетокот на оваа година, бидејќи повеќе од 55 проценти од акциите во таа компанија се заеднички во сопственост на руските „Газпром Нефт“ и „Газпром“.
Регион
Србите повеќе не можат да плаќаат за гориво со странски картички на бензинските на НИС

Од денеска во 11 часот на сите бензински пумпи на Нафтената индустрија на Србија (NIS), повеќе не е можно да се плаќа со меѓународни платежни картички, што е последица на американските санкции што стапија на сила.
Купувачите ќе можат да плаќаат за гориво на бензинските пумпи на NIS само со готовина, DINA картичка, мобилно банкарство или преку апликацијата Drive GO, според известувањата прикажани на сите бензински пумпи на оваа компанија низ цела Србија.
„Драги потрошувачи, Нафтената индустрија на Србија моментално работи под санкции: ПЛАЌАЊЕ СО КАРТИЧКИ НЕ Е МОЖНО: Mastercard, Visa и American Express“, се наведува во известувањето, пренесува nova.rs.
NIS објави дека специјалната лиценца на компанијата од Министерството за финансии на САД, која овозможуваше непречено оперативно работење, не е продолжена. Компанијата е на листата SDN (Специјално назначени национални компании) од јануари оваа година.
„Откако компанијата беше ставена на листата SDN во јануари, NIS внимателно ја следи ситуацијата и се обидува да го прилагоди своето работење на новите околности“, се вели во соопштението.
Компанијата нагласува дека приоритети остануваат редовното снабдување со нафтени производи на домашниот пазар и зачувувањето на социјалната стабилност за вработените.
„NIS обезбеди доволно залихи со нафта за преработка во овој момент, додека бензинските пумпи редовно се снабдуваат со сите видови нафтени производи“, се вели во соопштението.
За големопродажните клиенти, компанијата тврди дека се обезбедени непрекинати трансакции за плаќање во динари и дека платежните картички на корпоративните клиенти функционираат без проблеми.