Регион
Свечља: Убедени сме дека провокациите на Србија нема да престанат
Министерот за внатрешни работи на Косово, Џељаљ Свечља изјави дека и покрај подобрувањето на ситуацијата на северот на земјата, провокациите на Србија нема да престанат, пренесува Коха. Тој додаде дека српските сили ги доживуваат како закана.
„Убедени сме дека провокациите на Србија против државата Косово нема да престанат. Видовме мешавина од различни дестабилизирачки акции во четири северни општини во изминатите неколку дена под директно влијание на српската држава и претседателот Вучиќ. Влијанието дојде во форма на мобилизација, финансирање и логистичка поддршка. Покрај тоа, како закана имало и српски вооружени сили стационирани на границата. Секако, имаше влијание и од Русија, како и од криминалните организации во регионот, кои со години го злоупотребуваа северот на Косово како транспортен пункт за стока, дрога, па дури и луѓе и успеваа да заработат огромен профит. Сите овие фактори заедно го дестабилизираа не само северот на Косово, туку и целата земја“, рече Свечља.
Тој изјави дека има причина за загриженост, но не и за страв, одговарајќи на прашањето „дали очекува Србија да го нападне Косово“.
„Бевме и сме загрижени, но нималку исплашени. Анализата на ситуацијата се заснова на постоечки факти и причини. Но, не може целосно да се исклучат неразумните сценарија. Во моментов сме сведоци на војна во Европа, во која деспотот следеше мрачни цели за Украина и регионот, преминувајќи ги црвените линии што до неодамна изгледаа незамисливи“, рече тој.
Свечља е на мислење дека „српската заедница на север е во тешка ситуација поради постојаниот притисок од Белград“.
„Знаеме дека на нашите граѓани на северот на Косово не им е лесно. Затоа што се под постојан физички, психолошки и финансиски притисок од криминални организации контролирани од Белград. Но и од разни криминални организации од регионот. Од друга страна, обезбедуваме инструменти на владеење на правото кои се стремат да обезбедат безбедност за сите граѓани. Криминалните организации се тие кои се обидуваат да го потиснат локалното население, особено независните и чесни гласови. Убеден сум дека и таму наскоро ќе завладеат ред и закони“, рече Свечља.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.