Регион
Сообраќаен вештак: Полицијата веќе знае кој е виновен, министерот се спасил поради автомобилот

Министерот за одбрана на Хрватска, Марио Баножиќ утрово доживеа сообраќајна несреќа во Винковци во која загина 40-годишен маж, додека Баножиќ со тешки повреди заврши прво во болница. Сообраќајниот експерт Горан Хусинец за „Индекс“ ја коментира несреќата врз основа на фотографиите од местото на судирот.
„Станува збор за фронтален судир во кој секое возило со левиот преден дел удира во другото возило. Во теоријата за судири на возила ова е еден од најопасните типови. Вината не може да се утврди само од фотографии, треба да се земат во предвид и трагите од кочење. Кога се’ ќе се стави во просторниот план ќе се види кое возило преминало на спротивната лента. Тешко е да се прејудицира кој на која страна завршил, но според првите фотографии се чини дека возилото на министерот отишло на другата страна. Полицијата веќе го знае тоа, земаа траги, но се уште не е објавено“, рече Хусинец.
Тој додаде дека на фотографиите се гледа дека теренецот на министерот бил на левата лента, додека комбето ја избегнувало десната страна. „Индекс“ побара да ги коментира и изјавите на очевидците според кои Баножиќ наводно претекнувал камион во услови на магла.
„Ако претекнувал во магла, мора грубо да ги прекршил прописите. Тоа дефинитивно не е дозволено. Во такви ситуации не се престигнува друго возило. Најбезбедно е да се вози зад камион и да се следат неговите светла. Апсолутно не смеете да претекнувате во тие услови, услови на намалена видливост, кога не можете да видите пред вас. Лесно ќе се утврди кој на чија страна преминал, има многу индиции“, вели експертот и додава дека во 6 часот и 15 минути наутро, кога се случила несреќата, на патот било темно.
„Тој бил во џип, кој е солиден и сигурно му го спасил животот. Ова комбе е исто така многу силно. Се работело за брзина некаде околу 80 километри на час. Можете да видите дека неговата табла со инструменти и воланот се поместиле“, вели Хусинец.
Жељко Марушиќ од Факултетот за сообраќајни науки ја коментираше утринава несреќата во која загина 40-годишен маж при судар со автомобилот на Баножиќ.
„Министерот Баножиќ претекнал, навлегол и на спротивната лента неговиот автомобил се судрил со комбето што доаѓало“, вели Марушиќ.
Се’ уште нема официјална изјава од полицијата за причините за несреќата. Истрагата е во тек.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.