Одбележувањето на Валентиново, како што се нарекува во комерцијализираниот свет, одбележувањето на христијанскиот светец на грчкиот остров Лезбос, каде што инаку се чуваат останките – реликвиите за кои се тврдат дека му припаѓаат на свети Валентин, предизвика нов спор меѓу тамошните православни и католички верници, пишуваат во неделата грчките медиуми.

Православниот свештеник Атанасиос Јусмас од Митилена, главниот град на островот Лезбос, остро протестира во името на своите парохјани против прославата, во писмото испратено до градските власти.

Се заканил дека ќе се обрати пред судовите дека неговата црква, чијашто купола е симбол на градот Митилена, да не биде повеќе прикажувана на плакатите со кои граѓаните и туристите се повикуваат на прославувањето.

„Ние сме браќа и во текот на изминатите векови се ’расправавме’, но наша христијанска должност е да се помириме“, одговорил во отвореното писмо во медиумите пастирот на локалните католички верници Леон Кискинис, пренесува агенцијата ANA.

Припишувајќи го незадоволството на православните на „неколкумина ограничени фундаменталисти“, Кискинис истакнал дека свети Валентин, свештеник и бискуп на италијанскиот град Терни од III век, е признат како маченик пред црковниот раскол меѓу источната и западната црква.

Одбележувањата на Денот на свети Валентин на Лезбос започнаа од 2015 година, откако на островот се вратени реликвиите кои се чуваат во католичката црква „Вознесението на Марија“.

Свеченостите, коишто вклучуваат натпреварување во пеење и љубовни песни, завршува во вторник со процесија низ Митилена./крај/мф/сн