Србите од северниот дел на градот Косовска Митровица, на северот на Косово, го урнаа во неделата ѕидот на брегот на реката Ибар на нивната страна кој го делеше градот на српски и албански дел.

Два булдожера и неколку работници биле ангажирани на уривањето на ѕидот кој предизвикуваше тензии меѓу Белград и Приштина. Градоначалникот на Косовска Митровица, Горан Ракиќ, во саботата постигна договор со претставниците на косовските власти и меѓународната заедница за обновување на пешачката зона, што едногласно го поддржаа о советниците во Советот на општината Косовска Митровица.

„Со новиот план е предвидено новоизградената конструкција да биде исполнета со клупи свртени кон пешачката зона. Височината на првиот дел ќе биде 40 сантиметри, додека следната структура ќе биде 70 сантиметри, а широчината на двете структури ќе биде по 60 сантиметри што заедно прави 1,2 метри“, изјави градоначалникот Ракиќ.

Тој повтори дека ѕидот поради кој претходните денови и месеци имаше несогласувања и тензии, не е изграден поради ограничување на слободата на движењето, туку поради безбедноста на пешаците во пешачката зона.

Уривањето на ѕидот, како прв знак на попуштање на тензиите меѓу Белград и Приштина со седмици наназад беше предмет на разговори меѓу двете делегации и во средата во Брисел, под покровителство на Европската унија. Косовските власти во изградбата на ѕидот видоа политичка димензија со цел да се одржи поделбата на градот./крај/мф/сн