Регион
Странски медиуми: Одлуката на хрватскиот претседател е неочекувана
„Хрватскиот претседател Зоран Милановиќ денеска најави дека ќе се кандидира за помоќната премиерска функција“, пишува Ројтерс и ја опишува како „неочекувана одлука“, додека словенечката СТА наведува дека тоа би можело значително да ја промени ситуацијата поради неговата популарност во јавноста, покажуваат анкети на јавното мислење.
Изборите ќе се одржат на 17 април, најави претходно денеска Милановиќ.
Милановиќ, истакнува Ројтерс, е социјалдемократ и популист чиј претседателски мандат истекува во февруари 2025 година и беше во конфликт со Пленковиќ, а неговата најава дека ќе се кандидира за премиер беше неочекувана.
„Милановиќ и Пленковиќ често се расправаа за јавните и економските политики и начините за борба против пандемијата Ковид-19. Често се навредуваа и одбиваа да се сретнат“, додава Ројтерс.
Словенечката новинска агенција СТА се повика на последното истражување на јавното мислење објавено пред неколку дена на хрватската телевизија РТЛ, кое покажа дека ХДЗ и натаму има најголема поддршка.
Српската новинска агенција Бета објави дека дел од партиите, главно левицата и центарот, ја поздравиле одлуката на Милановиќ да учествува на изборите на кои ќе му се спротивстави на актуелниот премиер и претседател на ХДЗ, Андреј Пленковиќ и дека Милановиќ бил главен критичар на Пленковиќ во текот на целиот свој мандат.
Многу аналитичари уште во првите реакции посочија дека Милановиќ ризикува, но и дека и дава ветер во грбот на опозицијата која речиси и да немаше никакви шанси на парламентарните избори. Некои го критикуваат затоа што сметаат дека прво требало да се повлече од функцијата претседател, истакнува Бета.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Поставен рекорд во центарот на Белград: 1.000 гитаристи свиреа истовремено
Концертот на „Guitar Art“ денеска собра 1.000 гитаристи на плоштад во Белград, кои поставија национален рекорд во присуство на инструменталисти кои свират на гитара и слични инструменти, пренесе српска „Политика“.
Концертот „1.000 гитари“ ги привлече пред се во центарот на Белград најмладите гитаристи и нивните учители, но заедно свиреа цели семејства, составени од три генерации: дедо, татко и син…
Имаше мајки и ќерки кои „замавнаа“ со белградскиот блуз квартет и специјалните гости на концертот, меѓу кои Дејан Цукиќ, Ју групата, Кики Лесендриќ и Пилотите, Срѓан Гојковиќ Гиле, Бојана Стаменов, Никола Чутурило – Чутура. „Ова е конечно моментот кога барем на еден час ги заменуваме силиконите за витамини на ’Трг Републике’. Ова е сеќавање на мојата младост и почетоци во рокенролот. Среќен сум“, изјави Никола Чутурило Чутура за Танјуг.
За неколку минути неколку илјади љубопитни луѓе се собраа на плоштадот да уживаат во првокласен музички настан.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.