Регион
Убиецот од БиХ бил пријавен и минатиот месец: „Судот пресуди дека животот на жената не е во опасност“

Нермин Сулејмановиќ денеска уби три лица и рани уште три во градот Градачац во Босна и Херцеговина. Неговите жртви, освен полицаецот, не биле случајно избрани, беше откриено на прес-конференцијата што ја одржаа министерот за човекови права на Босна и Херцеговина Севлид Хуртиќ, премиерот на Тузла Ирфан Халилагиќ и министерот за внатрешни работи на Тузла Хајрудин Механовиќ.
„Ова е голем срам за нашето општество. Добив информација дека 12.000 луѓе го следеле настанот во живо, на 126 луѓе им се допадна. Тие беа среќни гледајќи ја туѓата несреќа. Ние како општество треба да бидеме загрижени каде одиме.Ве молам да ги намалиме тензиите и да помогнеме колку што можеме. Во 2021 и 2022 година 19 жени беа убиени во фемицид. Еве уште едно убиство. Би ја замолил пошироката јавност да не го заборави ова по два дена. Ова може да се повтори во секое семејство и град. Ве молам новинарите – вршете притисок врз нас и барајте да се смени законот, законот за фемицид да биде што поригорозен, за овие луѓе никогаш повеќе да не излезат од затвор“, рече Хуртиќ во Градачац.
Министерот за внатрешни работи на Тузла Хајрудин Механовиќ наведе дека првите индиции се дека не се работи за случајни, туку планирани ликвидации и дека жртвите се лица со кои убиецот имал одредени врски.
„Семејното насилство последен пат беше документирано пред еден месец во Градачац, кога не беше изречена мерка забрана за пристап до семејството бидејќи жената плашејќи се за себе, пред судот ја повлече изјавата и судот не оцени дека нејзиниот живот е во опасност, значи не определи мерки. Ова е системска грешка која некој мора да ја отстрани. Со денешниот пренос во живо добивме потенцијално Бог знае колку слични ликови кои се желни за пет минути слава и се подготвени да ги ризикуваат своите и животите на другите. Тоа треба да се регулира со државна регулатива“, рече Механовиќ.
Убиецот во живо на социјалните мрежи ја снимал ликвидацијата на сопругата, а потоа побегнал од местото на злосторството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.