Балканските земји имаат заеднички интерес и затоа треба добро да проценат каде одат и да размислат за „балканска федерација”, изјави вчера во Белград американскиот геополитички аналитичар Џорџ Фридман, со оценка дека е потребен силен Балкан, како партнер на САД против Русија и Турција.

Најголемата опасност за овој регион е самиот регион, вели Фридман додавајќи дека тероризмот е проблем, но не е егзистенцијален проблем за Балканот.

„Ако сте сами на себе најголема закана, вие самите сте решение”, рече тој.

Американскиот геополитички експерт и основач на „Стратфор” на прашањето за Косово рече дека не го интересира што нè дели во регионот туку она што нè прави силни. Тој потсети дека по распадот на Југославија три децении не беа баш среќни времиња за Западниот Балкан, нагласувајќи дека интеграцијата во ЕУ
ќе покрене многу прашања што не треба да се потценуваат.

„Ќе биде добро да процените каде одите, ситуацијата е комплицирана”, рече тој. Според него, нашиот спас не е во ЕУ, бидејќи најдобар дел од нашата историја бил во време на бивша Југославија, без оглед на репресивниот комунистичкиот режим.  Како што рече, земјите од Балканот не треба да се редат зад европските земји бидејќи веќе имаат избор – заеднички интерес.

„Ако Европејците немаат доволно нивни проблеми – нека ве интегрираат во регионот. Ако вие тука исто така немате доволно проблеми, интегрирајте се во ЕУ “, рече Фридман па праша: „Што бара воопшто Црна Гора во НАТО ?“

Фридман, исто така, укажа на постоење значаен интелектуален потенцијал во земјите од Балканот, при што ги спомена Србија, Хрватска и Словенија.

„Не постои место во светот каде што може да се купи таква добра експертиза, толку евтина, ништо не може да го замени тоа. Овозможете им на паметните глави да работат “, рече тој, па додаде дека „решенија има, а единственото што ни стои на патот сме ние самите“.