Во текот на вчерашниот ден, според податоците на Даночната управа на Хрватска, во продавниците се издадени нешто над три милиони сметки, што е за речиси два милиони фактури помалку од минатиот петок, на 17 јануари, кога беа издадени 4,94 милиони сметки, објави 24сата.хр.

Вчера е купена стока вредна само 52 милиони евра, што е за речиси 34 милиони помалку од на пример во четвртокот кога потрошувачите се подготвуваа за денот на бојкотот и потрошија 85,7 милиони евра. Во однос на средата вчера потрошиле 23 милиони евра помалку.

Во угостителството вчера се потрошени 10,4 милиони евра, а за други дејности кои издаваат фискални сметки уште 15,4 милиони евра.

За трговскиот бојкот на владина седница се огласи и премиерот Андреј Пленковиќ.

„Ова е важна и артикулирана порака до граѓаните да ги следат и споредат цените и да сметаат дека некои од овие цени се неприфатливи во споредба со слични или идентични производи таму. Пораката од граѓаните е важна и ќе биде земена предвид при дефинирањето на мерките за административно ограничување на цените на одредени производи, кои Владата ќе ги донесе следната недела“, рече Пленковиќ.

Да потсетиме, во петокот имаше бојкот на продавниците во Хрватска како реакција на континуираниот раст на цените. Иницијативата започна од Фејсбук групата „Здраво, инспекторе“, водена од Европскиот центар за извонредност на потрошувачите (ECIP), а оттогаш доби поддршка од здруженијата за заштита на потрошувачите, синдикатите, политичките партии, па дури и од министерот за економија.

Инаку, многу луѓе го искористија вчерашниот бојкот на хрватските продавници за да пазарат преку граница. Бојкотот беше организиран како одговор на растот на цените. Повикот за бојкот наиде на огромен одзив кај граѓаните: продавниците низ Хрватска стоеја празни од раните утрински часови.

Читател кој редовно оди на шопинг во Брежице, Словенија, за Индекс.хр вели дека паркингот на продавницата што се наоѓа таму вчера бил полн со автомобили со хрватски регистарски таблички. Слична е ситуацијата и денес. РТЛ пишува дека на паркингот на трговскиот центар во Брежице, Словенија, на само 40 километри од хрватската метропола, пронашле две полни паркиралишта со загрепски регистарски таблички.

„Јас често одам и ваква гужва навистина не е нормална. Мислам дека тоа е дефинитивно одговор на бојкотот и високите цени во хрватските продавници, бидејќи овде може да се најдат работи по многу поповолни цени. Касиерката вели дека денеска има зголемен сообраќај, но дека се подготвиле затоа што очекувале да има зголемен број на купувачи од Хрватска“, вели читателот.

„Еве, јас сум во Брежице во моментов и сите продавници имаат преполни полици. Се разбира, пазарат само Хрватите. Доминираат загрепските регистерски таблички, а за еден час во продавницата не слушнав Словенец”, изјави човек кој отишол на шопинг во соседна Словенија раскажува за Дневник.хр.

Тој додаде дека во продавницата „Хофер“ луѓето чекаат пет минути некој да врати количка бидејќи сите се во оптек.

„Очигледно вчерашниот бојкот уште повеќе ги налути луѓето, па отидоа преку граница и натоварија коли до врвот“, продолжи читателот.