Регион
Чешка: Мнозинството членки на ЕУ условуваат одобрување кандидатски статус за БиХ
Сите земји од Европската Унија го поддржуваат нејзиното проширување кон Западен Балкан, вклучително и Босна и Херцеговина, но некои не се откажуваат од барањето таа земја да покаже напредок за да добие кандидатски статус, а Чешка, која моментално претседава со Советот на ЕУ, исто така е застапник на овој критериум.
Ова го потврди и амбасадорката на Чешка во Босна и Херцеговина, Ивана Хлавсова, која денеска во интервју за „Независне новине“ од Бања Лука изјави дека е јасно оти некои членки на Унијата се залагаат БиХ да добие кандидатски статус за членство веднаш и без дополнителни услови, но мнозинството е против таквиот пристап и сака БиХ да спроведе барем дел од 14-те приоритетни реформи дефинирани од Европската комисија во 2019 година.
„Мнозинството верува дека БиХ треба да направи одреден напредок пред кандидатурата. Чешкото претседателство и Делегацијата на ЕУ во БиХ, која врши важна работа, продолжуваат да ги потсетуваат локалните власти колку е важно да се исполнат условите за кои веруваме дека се остварливи. Велат дека ни требаат добри вести за да можеме да водиме плодна дискусија во ЕУ. Мораме да имаме нешто што можеме да го претставиме, бидејќи во спротивно ќе биде тешко да се убедат многумина во ЕУ дека БиХ ќе ја добие кандидатурата“, рече Хлавсова.
„Треба сериозно да размислиме за промени на уставот на Босна и Херцеговина“
Таа не прецизираше кои земји се поборници за безусловно одобрување на кандидатскиот статус на БиХ, но хрватскиот претседател Зоран Милановиќ беше меѓу жестоките застапници на таквиот пристап, особено откако ѝ беше доделен кандидатски статус на Украина.
Амбасадорката Хлавсова рече и дека ставот на Чешка е дека по 27 години од потпишувањето на Дејтонскиот договор, дојде време сериозно да се разгледаат измените на Уставот на Босна и Херцеговина, кој е составен дел на тој документ.
Чешкиот амбасадор истакна дека тоа е документ чија цел била да се запре војната, а не да биде долгорочен аранжман за таа земја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.