Регион
Шолц и Макрон му пишаа и на Курти, бараат подготвеност за носење тешки одлуки
Освен на српскиот претседател Александар Вучиќ, францускиот претседател Емануел Макрон и германскиот канцелар Олаф Шолц испратиле писмо и до премиерот на Косово – Албин Курти, и тоа со речиси идентична содржина.
Истите пораки ги пренеле лидерите на двете земји од ЕУ. Тие го информирале Курти дека назначиле по еден советник за поддршка на Мирослав Лајчак, но и предложиле тројцата заедно да ги посетат Белград и Приштина.
Во писмото се наведува дека му го испраќаат на Курти во „клучен момент и за безбедноста на европскиот континент и за стабилноста во регионот на Западен Балкан“.
„Убедени сме дека во светлината на руската агресија против Украина, мораме да направиме уште посилни напори за да ја направиме европската перспектива на земјите од Западен Балкан реалност и да ги решиме долготрајните билатерални и регионални спорови“ – посочија тие.
Тие наведуваат и дека целосната нормализација на односите меѓу Белград и Приштина е од клучно значење за Западен Балкан, а како и досега ги повикаа Вучиќ и Курти да бидат подготвени за „тешки одлуки“.
„Ви се обраќаме како лидер на вашата земја да апелираме до вас да покажете максимална решителност и подготвеност да донесете тешки одлуки кои водат до напредок во дијалогот Косово-Србија предводен од ЕУ“ – се вели во писмото.
Тие, исто така, посочија дека неодамнешните тензии покажаа дека итно се потребни конструктивни чекори напред, како на практично, така и на политичко ниво.
„Затоа, ги задолживме нашите советници за надворешна и безбедносна политика, г-дин Јенс Плотнер и г-дин Емануел Боне, директно да го поддржат Мирослав Лајчак во неговите напори“ – се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.