Регион
Роднините на екс-грчкиот министер за финансии ќе одговараат за обвиненија по 'листата Лагард'
Роднините на поранешниот грчки министер за финансии, Георгиос Папаконстантину во среда ќе дадат писмени одговори на финансиското обвинителство во врска со истрагата за сметките на грчки граѓани во Швајцарија, од ткн „листата Лагард“, пишува во понеделникот весникот Kathimerini.
Грчкото обвинителство очекува објаснување од братучетката на поранешниот министер за финансии Георгиос Папаконстантину – Елени Папаконстантину и нејзиниот сопруг, како и од Андреас Росонис кој е женет за друга братучетка на поранешниот министер.
На оригиналната ткн „листа Лагард“ имало три имиња семејно поврзани со Папаконстантину кои подоцна биле отстранети во времето кога тој ја извршувал фунцкијата, што го открија грчките обвинители кога повторно ја добиле оригиналната листа, објави пред десетина дена грчкото обвинителство.
Грчките медиуми наведуваат дека се очекува тројцата да негираат дека нивните имиња биле избришани од списокот со имињата на грчките државјани кои имаат банкарски сметки во швајцарските банки и се товарат за затајување данок.
Папаконстантину претходно издаде соопштение во кое остро отфрла дека манипулираа со списокот, но неговата социјалистичка партија ПАСОК го исклучи од своето членство со образложение дека лошо го водел случајот.
Педесет иедногодишниот Георгиос Папаконстантину кој во 2012 година преговараше за првиот пакет меѓународна финансиска помош за Грција, негира дека ја изменил листата која ја прими од тогашната француска министерка за финансии и актуелна извршна директорка на ММФ, Кристин Лагард пред две години./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.