Албанската опозиција во петокот остро реагираше на изјавата на албанскиот министер за внатрешни работи Саимир Тахири дадена по средбата со неговата македонска колешка Гордана Јанкулоска, во која тој нагласува дека Тирана смета оти треба да се бори и против етничкиот тероризам.

„Оваа е срамна изјава на албанскиот министер“, се наведува во реакцијата на Демократската партија на Албанија која е главна опозициска партија во земјата. „Ова е најсрамната изјава дадена во историјата на Албанија и Албанците“, истакна во изјавата пратеникот и поранешен министер во владата на Сали Бериша, Алдо Бумчи пренесувајќи го ставот на опозицијата „Еден албански министер да говори за борба против етнички радикализам на Албанците во Македонија, наместо да бара спроведување на Рамковниот договор од Охрид, нé потсетува на времето кога така говореше Слободан Милошевиќ“, се наведува во реакцијата и притоа се додава дека официјална Тирана со оваа изјава на Тахири го легитимира ставот дека Албанците преставуваат опасност и дека тие се терористи. „Поради тоа, неопходно е владата на Еди Рама да го разреши на министерот Тахири“, изјави Бумчи.Инаку, во својата изјава дадена пред медиумите, албанскиот министер за внатрешни работи Саимир Тахири изјави дека „Регионален, но и глобален предизвик за нас останува верскиот и етничкиот тероризам. Бидејќи криминалот не познава граници, заедно со министерката Јанкулоска одлучивме да соработуваме и заедно да се бориме против радикализмот и криминалитетот“, истакна Тахири. /крај/мф/мн

Извор: Макфакс