Грчката полиција во средата извршила голема антитерористичка операција во Солун и во главниот град Атина, при што е запленето оружје а уапсени се шест лица осомничени за подготовка на голем терористички напад, објавија во четвртокот властите.

Пребарувањата биле извршени во неколку атински квартови како Колонаки и Егзархија, при што биле откриени автоматски пушки „калашников“ , пиштоли, гранати, муниција, фалсификувани лични карти, како и материјали за производство на експлозивни направи.

Приведените лица се анархисти и се поврзани со терористичката група Заговор на огнените келии, пишува во четвртокот весникот Имерсија.

Еден од уапсените бил државјанин на Албанија, прецизира весникот Катимерини. Приведените, исто така, се осомничени и за два вооружени грабежа извршени на 21-ви јули и 23-ти август годинава во Солун. Во првиот случај од експозитура на банка беа украдени 120 илјади евра. Во вториот случај, пак, при грабежот во подружница на енергетската компанија ДЕИ, четворица маскирани мажи отворија оган пред канцеларијата за да ги заплашат вработените.

„Тие се состанале во Атина за извршување терористички напади и биле во потрага по оружје за реализирање на своите планови“, изјавил за Катимерини неименуван полициски службеник вклучен во истрагата.

Според него, терористичките напади осомничените ги планирале во рамките на ткн „Проект Феникс“, програма на терористичките активности објавена летото 2013 година. Според него, групата ја преземала одговорноста за нападот од 7-ми јуни 2013-та кога беше кренат во воздух автомобилот на директорот на најпознатиот грчки затвор „Коридалос“. /крај/мф/сн

Извор: Макфакс