Американскиот потпретседател Џо Бајден на косовските политички лидери им порачал дека мора да обезбедат формирање на Заедницата на српски општини (ЗСО), а доколку не го направат тоа тогаш ќе ја загубат поддршката од САД, пренесуваат српските медиуми.

Бајден исто така побарал од приштинските власти да го ратификуваат договорот за демаркација на границата со Црна Гора. На заедничката прес-конференција со косовскиот претседател Хашим Тачи, Бајден изјавил дека овој договор и формирањето на ЗСО ќе имаат позитивно влијае врз регионот. Косовскиот претседател Тачи исто така додал дека „без ЗСО Косово ќе остане изолирано и од САД и од ЕУ“.

„Сакам да го потпишете договорот со Црна Гора. Тоа е фер договор и ќе има позитивно влијание врз регионот, исто како и Заедницата на српските општини. Некои одлуки мора да се истуркаат, но тешките одлуки ќе вродат со плод. Болките од војната се уште се свежи и сите овие лузни се свежи, но Косово мора да оди напред кон заедничката иднина и еднаквите права за сите граѓани“, рекол Бајден.

Тој додал дека Приштина мора да има блиска соработка со своите соседи, и дека премиерот Мустафа и претседателот Тачи позитивно се изјасниле за продолжувањето на разговорите со Белград, со посредство на Брисел. „Тоа ќе биде тешко, но неопходно. Со српскиот премиер Вучиќ исто така разговарав за овие прашања“, рекол Бајден, предупредувајќи дека албанските политичари имаат обврски и одговорност да се придржуваат кон ветувањата кои се дадени во Брисел./крај/мф/бс