Бројот на граѓаните кои го поддржуваат или се против членството на Црна Гора во НАТО е речиси изедначен, покажа објавената во средата анкета на Центарот за демократија (ЦЕДЕМ) во Подгорица.

Членството на Црна Гора во НАТО го поддржуваат 39,5 отсто нејзини граѓани, а против се 39,7 проценти, додека 20,8 отсто немаат ставови за тоа.

„Тоа значи дека бројот на противниците и приврзаниците во НАТО е речиси изедначен, па резултатот од евентуалниот референдум за членство во Алијансата би бил неизвесен“, изјави на прес-конференција Милош Бешиќ, главниот методолог на ЦЕДЕМ, претставувајќи ги резултатите од ова истражување на јавното мнение.

Црна Гора во мај потпиша протокол за пристапување на НАТО, чијашто членка ќе стане по ратификацијата во сите 28 земји членки. Се тврдеше дека случувањата во светот влијаат на поддршката за членството на Црна Гора во НАТО.

Бешиќ вели дека 53,8 отсто од граѓаните веруваат дека Црна Гора ќе стане членка на НАТО, без оглед на нивното мислење, 20,5 отсто мислат дека нема, додека 25,7 отсто нема став за тоа.

На прашањето околу Европската унија речиси е постигнат национален консензус, без оглед на тоа што симпатизерите на ЕУ е во пад. Дури 63 отсто испитаници сметаат дека Црна Гора треба да стане членка на ЕУ, 24,6 проценти дека не треба, а мислење немаат 12,4 отсто испитаници.

Анкетата покажала дека 27,2 отсто од граѓаните сметаат дека Црна Гора во надворешната политика треба да се потпира на ЕУ, 20,5 отсто мислат дека тоа би требало да биде Русија, а 15,4 проценти сметаат дека е најдобро да се потпира на САД.

„Трендот на поддршката на ЕУ опадна во однос на минатата година. Тоа не е случај само кај нас, туку и во регионот и во членките на самата ЕУ“, напомна Бешиќ.

Според истражувањето, 35,3 отсто од испитаниците рекле дека Црна Гора тргнала во погрешна насока, 32,8 отсто дека земјата е на вистинскиот пат, а 31,8 отсто не знаат или не можат да проценат по каков пат се движи нивната земја./крај/мф/сн