Шпион кој за бугарската разузнавачка служба во периодот на комунизмот работел во Ватикан, најави дека наскоро ќе објави книга со тајните од Ватикан.

„Заедницата во книгата ќе дознае за многу од таканаречените ватикански тајни“, изјави за новинската агенција Фокус, сега 69-годишниот инаку историчар и поранешен соработник на тајните служби, Божидар Димитров најавувајќи ја својата книга под наслов „За кожата на еден полицаец“.

Димитров тврди дека за бугарската тајна служба во Ватикан работел во периодот од 1974 до 1990 година и дека во Апостолската библиотека собирал тајни документи.

„Можеби требало да се даде жртва и затоа официјално ме отпуштија без да престанат да работат со мене. Дури во 1980-те дознав дека не сум дел од нив. На корицата од мојата книга е картата од тајниот архив на Ватикан од 1988 година, како сум можел да отидам таму, ако не сум бил таен агент?“, вели Димитров и додава дека за разлика до другите кои сакаат да кажат дека „малку време“ биле соработници на тајните служби, тој самиот тврди дека бил агент повеќе од десет години, односно според официјалните документи.

Божидар Димитров во моментов е директор на Националниот историски музеј во Бојана. Во македонската јавноста е познат по контроверзните толкувања и препирки со историчарите.

По падот на комунизмот остана политички активен, а во средината на 2009 година ја напушти Бугарската социјалистичка партија (БСП) и и’ се приклучи на владејачката Граѓани за европски развој на Бугарија (ГЕРБ), партија од десниот центар на актуелниот премиер Бојко Борисов. До 2011 година беше министер без ресор, односно задолжен за прашањата на Бугарите во странство, но поради поврзаноста со тајните служби мораше да отстапи од функцијата./крај/мф/сн

Извор: Фокус.бг