Регион
Четворица уапсени за експлозијата во Истанбул, Ердоган ги обвинува курдските милитанти

Четири лица се уапсени под сомнение дека се вмешани во нападот со автомобил бомба во истанбулскиот кварт Везнеџилер, во округот Бајазит, во вторникот утрото во кој беа убиени 11 луѓе, од кои седум полицајци, и ранети се уште 36, а турскиот претседател Реџеп Тајип Ердоган за нападот кој официјално е карактеризиран како терористички чин ги обвини герилците од забранетата Работничка партија на Курдистан (PKK).
„Не е новина дека оваа терористичка организација (PKK- з,р.) поттикнува напади во градовите. Нашата борба против тероризмот ќе продолжи до крајот, до апокалипсата… овој напад не може да биде простен“, изјави турскиот претседател Реџеп Тајип Ердоган за новинарите при посетата на ранетите во болниците, пренесува AFP.
Според сознанијата на агенцијата Anadolu, која се повикува на безбедносни извори, четворица се уапсени во акција на одделот за тероризам во истанбулската Управа за безбедност, во чие седиште се однесени на испрашување.
Детонацијата била активирана во близина на автобус со припадници на специјалната полиција во близина на постојка на јавниот сообраќај, меѓу седиштето на локалната општина и кампусот на истанбулскиот универзитет, недалеку од историскиот центар на градот на европскиот брег од Босфор.
Полицискиот автобус, кој е најсилно погоден од експлозијата се превртел на покривот покрај улицата, а покрај него оштетени се и други автобуси и возила на истата улица. Експлозијата ги искршила прозорците на блиската џамија и на многу дуќани и разнела парчиња по околните улици. Меѓу 36-те ранети три се во критична состојба, изјави истанбулскиот гувернер Васип Шахин.
Неколку сведоци изјавија за турските медиуми дека по експлозијата слушнале од тој правец истрели, но не е познато дали пукале напаѓачите или полицајци во обидот да ги заштитат своите колеги.
Местото на експлозијата и натаму во вторникот е блокирано од полицијата на Истанбул.
„Кажано ни е дека со тоа полицијата сака да ги задржи луѓето што подалеку од местото на експлозијата. Почувствував како почвата се потргна под мене. Никогаш нешто такво немам почувствувано“, изјавил за Reuters Мустафа Челик, сопственик на блиска туристичка агенција.
Засега никој не ја презема одговорноста за вторничниот напад. Меѓутоа за претходни два напада врз автобуси со офицери и полицајци во Анкара за кои одговорноста ја презема курдската милитантна група екстремната курдска фракција Јастреби за слободата на Курдистан (ТАК). Инаку станува збор за четврта голема експлозија во турскиот мегалополис Истанбул од почетоков на годинава, од кои во најмалку два цели беа странски туристи.
Ова крило кое се декларира како отцепено од PKK, но според Анкара има тесна координација со неа, ја презема одговорноста и за нападот од 15-ти мај во Истанбул во кој беа повредени седум лица. Како и во денешниот напад, и тогаш бомбата поставена во паркиран автомобил експлодираше при поминување на минибус со припадниците на турските безбедносни сили.
Турција повеќе од половина година живее во вонредна состојба прогласена поради серијата напади започната од јули 2015 година кои им се припишуваат на екстремната сунитска организација Исламска држава и на курдските милитанти., поради што земјата бележи загрижувачки пад на туризмот. Бројот на странските гости во април паднал за 28 отсто, што е најголемиот пад во изминатите 17 години. На туристичкиот сектор и досега не му цутеа рози, имајќи ги предвид откажувањата на руските туристи кои минатата година оставиле во Турција околу четири милијарди долари, по конфликтот меѓу Москва и Анкара по ланското турско соборување на руски борбен авион во близина на сириската граница. Меѓутоа, сега се очекува брзо да се откажуваат веќе постигнатите аранжмани, имајќи предвид дека западните земји исто така ги предупредија своите граѓани за патувања во Турција поради опасност од терористички напади.
Воените операции покренати против герилата на PKK во југоисточниот претежно курдски дел на Турција покрена востание во неколку тамошни градови со мнозинско курдско население и предизвикаа егзодус на населението. Турските сили убиле илјадници курдски бунтовници во операциите кои се водат и на курдските територии во соседен Ирак, но доживеале и значителни загуби во своите редови, како никогаш претходно во судирите со милитантите. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пожари беснеат на Балканот: илјадници се евакуирани, гори и во близина на популарна туристичка дестинација во Албанија

Пожарникарите денес се обидуваат да изгаснат шумски пожари во три одделни покраини во Турција, Грција, во близина на туристичка дестинација во Албанија, Бугарија, Македонија по неколкудневните интензивни горештини.
Чад се издигаше над планинската црноморска покраина Карабук, околу 200 километри северно од главниот град Анкара, а пожарот, кој беснее веќе шести ден, принуди евакуација на повеќе од десетина села и опустоши делови од шумата. Тројца пожарникари загинаа вчера во северозападната покраина Бурса, објави денес турското Министерство за шумарство.
Пожарникарите денес се борат со два одделни пожари, по евакуацијата на повеќе од 3.600 луѓе од населбите во јужните покраини Мерсин и Анталија. Турција беше место на десетици шумски пожари поради екстремна топлина во последните недели, а минатата недела 10 пожарникари загинаа борејќи се со пожар во централната покраина Ескишехир.
Топлите и суви лета се вообичаени во медитеранскиот регион, но сè поинтензивните топлотни бранови придонесоа за разорни шумски пожари во последните години. Во Грција, десетици пожарникари се борат со пожар што избувна во подножјето на планината Химет во Атина, во близина на универзитетски кампус во густо населено предградие. Најмалку 18 хеликоптери и авиони дејствуваат во областа.
Во Албанија, пожарникарите, со помош на армијата, се обидоа да го стават шумскиот пожар под контрола пред да стигне до крајбрежниот град Саранда и други туристички места на југот од земјата на јонскиот брег. Локалната полиција објави дека во последните три дена уапсила 13 лица за намерно палење.
Бугарија распореди противпожарни авиони за да им помогне на копнените сили во борбата против голем шумски пожар во пошумен југозападен регион, додека во Грција неколку села беа евакуирани, а пет лица беа повредени во одделни пожари за време на викендот, кои беа поттикнати од висока топлина и силни ветрови.
Додека Грција денес се соочува со својот трет топлотен бран, дождот во Србија им помогна на пожарникарите да стават под контрола повеќе од 100 шумски пожари.
Во моментов низ Македонија беснеат 15 пожари на отворено, од кои девет сè уште се активни, а шест се ставени под контрола. Најсериозни се огнените линии кај Прилеп, Василево, Кавадарци, Македонски Брод и Берово, каде гори шума, грмушки и ниска вегетација. На некои места ситуацијата е дополнително отежната поради детонации и непристапен терен. Од друга страна, пожарите кај Штип, Карбинци, Кичево и околината на Куманово се стабилизирани и под надзор. Властите повикуваат на внимателност и воздржување од активности што можат да предизвикаат нови пожари.
Регион
Русин и Германец снимале голи деца со мобилни телефони во камп на Истра

Полицијата на Истра во саботата уапси двајца мажи, еден Русин и еден Германец, кои тајно снимале голи деца во туристички камп. Двајцата беа однесени во полициската единица за притвор под сомнение за кривично дело експлоатација на деца за порнографија и беа обвинети за кривично дело.
Како што соопшти полицијата денес, во саботата, околу 12.45 часот, обезбедувач во туристички објект во областа Ровињ пронашол 56-годишен руски државјанин како тајно снима голи деца со својот мобилен телефон и го притворил додека не пристигнала полицијата.
Истиот ден околу 14.40 часот обезбедувач во истиот камп пронашол и 52-годишен германски државјанин како тајно снима голи деца со својот мобилен телефон и исто така го притворил додека не пристигнала полицијата.
Врз основа на налог од надлежниот суд полицијата ги претресе сместувачките единици, мобилните телефони со придружните мемориски картички што ги користеле осомничените и пронајде инкриминирачки материјал. Осомничените беа предадени на полициската единица за притвор во Истра вчера попладне со кривични пријави.
Регион
Вучиќ: Србија нема да воведе санкции против Русија

Претседателот на Србија, Александар Вучиќ, изјави дека Србија нема да воведува санкции кон Русија и дека ќе се држи до својата сегашна политика, и покрај различните најави од владата.
Вучиќ рече дека граѓаните на Србија поддржуваат таков правец бидејќи тоа е „политика на независна и суверена држава“.
„Ќе продолжиме со нашата политика, која беше принципиелна и која досега се покажа како точна, која никому не му се допаѓаше, ниту на оние на Запад ниту на оние на Исток“, нагласи Вучиќ.
Реакцијата на Вучиќ следи по интервјуто на министерот за европски интеграции Немања Старовиќ за австриската агенција АПА. Старовиќ навести дека Србија може да размисли за усогласување со санкциите на ЕУ против Русија откако нејзиното членство во Унијата ќе стане неизбежно.
Тој објасни дека одбивањето да се воведат санкции произлегува од економска неопходност, а не од политичка лојалност кон Москва.
„Русија воопшто нема да биде погодена, но српската економија ќе биде погодена во огромна мера“, рече Старовиќ.
Сепак, претседателот Вучиќ ги отфрли тие изјави, нарекувајќи ги „невнимателни“.
„Жал ми е што некои од нашите пријатели во руските медиуми едвај чекаат да најдат нешто за кое ќе ја критикуваат Србија. Исто така, жал ми е што имаме многу луѓе на нашата домашна политичка сцена кои би сакале да ги бранат Русите отколку Србија. Морам да ги разочарам, Србија нема да воведе санкции врз Русија“, рече Вучиќ.