Грчкиот премиер Алексис Цирпас изрази во средата во Брисел по разговорите со челниците на трите европски институции оптимизам дека со европските партнери ќе постигне одржлив договор за иднината на неговата земја, додека неговиот министер за финансии Јанис Варуфакис претходно во средата рече дека по „конструктивниот“ состанок со претседателот на Европската централна банка (ECB) Марио Драги од кого бараше поддршка за грчките банки, дека е охрабрен од разговорот и дека „верува во иднината“. 

„Сé уште нема договор, но сме на вистинскиот пат кон одржлив договор“, изјави грчкиот премиер Алексис Ципрас по разговорот со претседателот на Европскиот парламент, Мартин Шулц. Ципрас во средата во Брисел се средна и со претседателот на Европската комисија, Жан-Клод Јункер, на Европскиот совет, Доналд Туск. Меѓутоа, единствено по средбата со Шулц беше одржана прес-конференција, но без можност новинарите да поставуваат прашања.

„Голем оптимист сум дека ќе направиме сé што можеме за да изнајдеме заеднички, одржливо и заемно прифатливо решение за нашата заедничка иднина. Нашата цел е да се почитува суверенитетот на грчкиот народ и јасниот мандат на нашиот народ. Истовремено, ние ги почитуваме правилата на Европската унија. Сакаме да ја поправиме таа рамка., а не да ја уништиме и веруваме дека во таа рамка можеме да пронајдеме заедничко одржливо решение. Секако, уште немаме решение, но на добар пат сме да пронајдеме одржлив договор“, изјави Ципрас.

Потпретседателот на Европската комисија Марош Шефович на друга прес-конференција, на новинарско прашање за разговорите меѓу Јункер и Ципрас, изјави дека „се договорија дека ќе ги продолжат разговорите, но не преку медиумите“.

Претседателот Доланд Туск по средбата со Ципрас се огласи со соопштение во кое предупреди дека на Грција и’ претстојат тешки преговори. „Кога станува збор за европската финансиска помош на Грција, ја нагласив потребата да се пронајде решение прифатливо за сите земји членки вклучени во преговорите. Тие преговори ќе се водат во рамките на еврогрупата. Тие ќе бидат тешки, ќе бараат соработка и дијалог, како и решителни напори од Грција“, се вели во писмената изјава на Туск.

„Се согласивме околу важноста на Европската унија во поглед на клучните предизвици со коишто се соочува Европа“, се додава во изјавата на Туск со јасна алузија на потребата на единство во ЕУ кон Русија, во врска со двосмислените изјави кои доаѓаат од грчките владини функционери во врска новите европски санкции против Москва поради нејзината наводна улога во украинската криза.

Претходно во Франкфурт новиот грчки министер за финансии Јанис Варуфакис се сретна со првиот човек на Европската централна банка, Марио Драги.

„Водевме многу конструктивни разговори“, рече Варуфакис за новинарите по средбата, и додаде дека комуникацијата била извонредна, што го охрабрува за во иднина.

„ЕСВ е клучна во трката на Грција со времето за да го избегне банкротот. Банката мора да ги поддржи нашите банки кои би ја задржале главата над водата со помош на краткорочни пренесувања на долгот“, рече Варуфакис во разговорот за германскиот неделник Die Zeit објавен во средата во кое признава дека е „министер за финансии на држава во стечај“.

Грчките банки се главните купувачи на грчките обврзници, со коишто земјата краткорочно се финансира. Главно ЕСВ преку двата механизам за заеми, редовни и итни, им доставува парти на грчките банки. Варуфакис изјави дека во разговорот со Драги ги споменал „обврските, правилата, проверките и процесите“ со коишто ЕСВ ја доделува својата помош, подразбирајќи дека претседателот на ЕСВ би бил подготвен да ги пречекори правилата.

На пазарите, меѓутоа, малку учесници очекуваат дека Драги безусловно ќе се согласи на грчките барања. „Пораката ќе биде јасна, без договор со еврозоната, ЕСВ треба да го прекине поддржувањето на грчките банки со готови пари“, вели за AFP Кристијан Шулц, економист од банката „Berenberg“.

Премиерот Ципрас и министерот Варуфакис се на европската турнеја за своите идеи да ги запознаат партнерите во Европската унија, како да се продолжи откако во предизборната кампања ветија дека ќе ги прекинат мерките за штедење кои Грција ги прифати од меѓународните доверители во замена за огромната финансиска помош која земјата ја спаси од банкрот.

Ципрас во вторникот во Рим разговараше со италијанскиот премиер Матео Ренци, а веднаш по состанокот со тројцата челници на ЕУ, од Брисел отпатува за ПАриз на разговори со францускиот претседател Франсоа Оланд./крај/мф/сн

Извор: Макфакс