Српскиот министер за надворешни работи, Ивица Дачиќ во четвртокот ги предупредил Албанците од југот на Србија да не прават споредби со Заедницата на српски општини (ЗСО) на Косово со формирањето на Асоцијацијата на општини со албанско мнозинство, пренесуваат српските медиуми.

Коментирајќи ги најавите на лидерите на Албанците од југот на Србија за формирање на таква асоцијација, Дачиќ изјавил дека Албанците во Србија не смеат да бидат дискриминирани, но дека мора да го почитуваат нејзиниот Устав.

„Ги предупредуваме во сабота во Прешево да не прават некаква споредба со ЗСО на Косово, ги предупредуваме да не си играат со оган и да го почитуваат уставниот поредок на Србија. Тоа што Србија е за дијалог не значи дека е слаба, туку напротив, таа е силна, најсилна во последниве 20,30 години“, рекол српскиот министер.

Тврдењата, пак, дека Србија го признала Косово со тоа што во Брисел води преговори за нормализација на односите, Дачиќ ги оценил како „лага“.

„Денес слушнав дека албанскиот премиер изјавил оти Србија го признала Косово, со тоа што ги води преговорите во Брисел. Тоа е лага. Сакам да им порачам на Албанија и Албанците дека Србија сака добри односи во регионот и на албанското национално малцинство му гарантира рамноправност, но Србија нема да дозволи некој да ја понижува и да го загрозува нејзиниот територијален интегритет“, рекол Дачиќ.

Според него, договорот за ЗСО и потпишувањето на Бриселскиот договор претставуваат најголем успех на владеачката српска коалиција.

„Србија со сите свои сили, политички, дипломатски и сите останати средства, ќе ги заштити интересите на српскиот народ на Косово“, рекол шефот на српската дипломатија./крај/мф/бс