Србија нема да потпише меѓународен мировен договор со Косово, изјави шефот на српската дипломатија Ивица Дачиќ за српскиот весник Данас.

Од друга страна, наведува српскиот весник, косовскиот премиер во заминување Хашим Тачи најавува дека овој договор ќе биде потпишан наскоро, како увертира за почетокот на втората фаза од дијалогот меѓу Белград и Приштина.

„Хашим Тачи мисли на меѓународно признавање меѓу Србија и Косово. Србија нема да го потпише тој договор“, рече српскиот министер.

Косовскиот премиер минатата недела во Берлин изјавил пред германската канцеларка Ангела Меркел, но и пред сите останати кои беа присутни на конференцијата за западен Балкан дека „Косово е подготвено да породолжи со втората фаза од дијалогот“, која би требало да биде финализирана со „меѓународен договор за мир меѓу Косово и Србија“.

„За тоа говореше и косовскиот министер за надворешни работи пред Советот за безбедност на ОН, што е само пример за нивното слепило. Тие мислат дека веќе сé е решено што се однесува до статусот на Косово и дека врз нас само треба да биде извршен притисок. Ние не го променивме нашиот став и сите договори кои се постигнати се статусно неутрално“, објасни Дачиќ.

Косовскиот министер за надворешни работи, Енвер Хоџај пред Советот за безбедност на ОН изјавил дека Косово е подготвено за дијалог со Србија до целосна нормализација на односите, но тоа не значи дека дијалогот треба да биде бесконечен и дека тој треба да биде финализиран преку потпишувањето на меѓудржавен мировен договор./крај/мф/бс