Српскиот министер за надворешни работи Ивица Дачиќ во вторникот на Бледскиот стратешки форум изјавил дека во евроинтеграциите балканските држави имаат „едвај половичен успех“, но дека ентузијазмот за влегувањето во ЕУ и натаму е доволно висок, пренесуваат српските медиуми.

Дачиќ додал дека поради економската и миграциската криза, Brexit, како и порастот на заканите од тероризмот, можно е ЕУ да ја загуби својата привлечност, а дополнително политиката на условување кај земјите кандидати остава впечаток на нерамоправен однос.

„Не смее да се заборави дека политиката на проширувањето е една од најуспешните политики во историјата на европскиот проект, со кој беше направена трансформација на голем број држави и беше проширен просторот на слободата и просперитетот. Во таа смисла, пристапувањето на државите од Западен Балкан дополнително би ја засилиле европската идеја во моменти кога таа, во самите членки, се соочува со предизвици и сомнежи кои ги замаглуваат нејзиното историско значење“, рекол Дачиќ.

Според српскиот министер, ветувањето кое им беше дадено на земјите од Балканот со Солунскиот документ во 2003-та година, односно дека ќе станат полноправни членки на ЕУ кога ќе ги исполнат условите, влева надеж дека Брисел ќе ги препознае напорите за градење на демократски општества.

Од Солунската агенда од 2003-та година, само Словенија и Хрватска станаа членки, додека Србија и Црна Гора ги започнаа пристапните преговори, а Македонија, иако долги години е кандидат за членство, се уште не ги започна преговорите, како ни Албанија, додека, пак, Босна и Херцеговина има статус на потенцијален кандидат.

„Кога ќе се подвлече црта под овие резултати, може да се рече дека успехот е едвај половичен, но потребно е да се нагласи дека ентузијазмот за членство кај државите кандидати и потенцијалните кандидати и натаму е значително висок, но мора да се рече дека е и значително повисок од оној кај земјите членки кон политиката за натамошното проширување“, додал шефот на српската дипломатија.

Дачиќ навел дека „политиката на условување неретко се спроведува без доволно политичко разбирање, што во јавноста кај државите кандидати создава впечаток на нерамноправен однос, а поставените услови изгледаат како `движечка мета`“/крај/мф/бс