Турскиот премиер Ахмeт Давутоглу изјави во петокот Дијарбекир, ден по бомбашкиот напад во кој беа убиени седум полицајци на немирниот претежно курдски југоисток од Турција, дека земјата не се плаши и дека нема да откаже од борбата со курдскиот бунт.

„Не се плашиме, и нема да нé поколебаат“, порача турскиот премиер Ахмет Давутоглу во Дијабрекир, град во кој мнозинството население го сочинуваат Курдите, оддавајќи им чест на полицајците кои загинаа во нападот изведен со автомобил бомба во четвртокот при што беа ранети уште 27 луѓе, претежно полицајци, а за кој одговорноста ја преземаа курдските герилци.

Во својот говор Давутоглу акцентот го стави на „братските“ врски меѓу Турците и Курдите, откако турско-курдскиот децениски судир минатото лето повторно се разгоре по пропаѓањето на двегодишното примирје и првите разговори за започнување преговори.

Военото крило на забранетата Работничка партија на Курдистан (PKK) во петокот ја презема одговорноста за нападот од четвртокот, во соопштението што го пренесе курдската новинска агенција Firat, наведувајќи дека нападот бил „одговор на нападите на турската армија во Курдистан“.

„Мислеа дека ќе не исплашат. Не се плашиме, нема да нé поколебаат, ќе бидеме решителни до крајот“, предупреди Давутоглу.

Полицијата во Дијарбекир во меѓувреме уапсила девет осомничени лица во рамките на истрагата, соопштија турски безбедносни извори за медиумите.

Турскиот исламско-конзервативен претседател Реџеп Тајип Ердоган, кој престојува во посета на Вашингтон, ја повика меѓународната заедница да го поддржи дејствувањето на владата во Анкара против курдските сепаратисти кои ги обвини за нападот и пред тие да ја преземат одговорноста за него.

„Тоа не можеме повеќе да го трпиме. Европските, и другите земји, можат, се надевам, да видат кој стои зад тие напади“, истакна Ердоган во Вашингтон.

Како одговор на нападот од четвртокот, дванаесет ловци на турската авијација извеле две серии удари врз базите на PKK во Запа и Метина, на северот од Ирак, соопшти во петокот турската армија.

Турција последните месеци живее во зголемена безбедносна готовност по низата невидени напади кои им се припишуваат на џихадистите или на обновувањето курдските судири. Последниот таков напад се одигра на 19-ти март во центарот на Истанбул, кога во акција на бомбаш самоубиец најверојатно поврзан со Исламската држава беа убиени четворица туристи, тројца од Израел и еден од Иран./крај/мф/сн

Извор: Reuters/AFP