Двајца службеници на амбасадата на Србија во Либија, коишто беа грабнати ланскиот ноември во градот Сабрата, најверојатно загинале во воздушните удари на американските сили врз база на екстремната сунитска организација Исламска држава во овој либиски град, објавија во саботата белградските медиуми, повикувајќи се на пишувањето на весникот LibyaHerald.

Веста за загинувањето на двајцата српски дипломати до агенцијата Танјуг ја испратил заменикот на главниот уредник на LibyaHerald, Нигел Аш, но таа официјално не е потврдена, што го наведува на својата страница и либискиот весник.

Во меѓувреме вонредна прес конференција свикаа шефот на српската дипломатија Ивица Дачиќ и претставниците на Безбедносно разузнавачката агенција (БИА), пренесе Радио-телевизија Србија.

„За жал, вчера попладнето добивме информации дека во нападот настрадале повеќе странски државјани, меѓу кои и двајца службеници на нашата амбасада. Информацијата се уште не е официјално потврдена од либиските органи. Се очекува идентификација, не можеме со сигурност да потврдиме, но добивме фотографии кои јасно потврдуваат дека таа информација најверојатно е точна“, изјави на прес-конференцијата Дачиќ.

Американското министерство за одбрана потврди дека неговите воздухопловни сили извршиле воздушни напади, наведувајќи дека целата бил камп за обука на Исламската држава во Сабрата.

Според Пентагон, целта претставувала опасност за САД. Во нападот загинале повеќе од 40 луѓе, најголем дел Тунижани кои се наоѓаат во соседна Либија.

Двајцата службеници на српската амбасада беа грабнати во либискиот град Сабрата на 8-ми ноември, при напад врз колона возила во која бил и амбасадорот на Србија Оливер Потежица./крај/мф/сн

Извор: Макфакс