Регион
DW: “Ердоган би сакал да има поголема моќ на Балканот”

Турскиот претседател Реџеп Таип Ердоган се уште нема толкава моќ да го контролира Балканот, а преку него да влијае врз европската политика. „Турција нема толкава моќ на Балканот колку што би посакал да ја има Ердоган, изјави во понеделникот косовскиот експерт Еродан Шиполи од Универзитетот Џорџтаун.
Во случај политичката елита од Балканот да има можност да избира таа и натаму ќе продолжи да ја избира ЕУ.
Според него, Ердоган смета дека тој преку Балканот може да влијае врз европската политика.
“Кога станува збор за политичко влијание на Косово, во Албанија и Босна и Херцеговина, Турција дефинитивно е важен регионален играч, но само додека нејзината политика не е во спротивност на интересите на политиката на ЕУ. Бидејќи главната цел на балканските земји е приклучувањето кон ЕУ. Долги години тоа беше целта и на Турција. Сега Турција се оддалечува од неа, а се намалува и нејзиното влијание на Балканот “, вели Шиполи.
Според него, Анкара има најсилно влијание во БиХ, во Македонија, на Косово и во Албанија.
“Се разбира, подобри се трговските односи со Бугарија, како и комуникација со локалната турската заедница отколку со турската заедница, на пример, на Косово. Во реалноста, политичкото влијание на Турција на Балканот не е толку големо колку што таа го претставува. Единствениот начин да се зголеми тоа влијание е ЕУ да го прекрши ветувањето за соработка со земјите од Балканот. Инаку, ако треба да се избира, земјите од Балканот секогаш ќе застанат на страната на Европа, и нема да жалат за Турција “, вели Шиполи.
Тој додава дека не верува дека треба да се очекува дестабилизација на Балканот.
“Турција нема интерес безбедносната ситуација на Балканот да е нестабилна, бидејќи тогаш земјата е целосно опкружена со нестабилни региони. Но, дел од одговорноста е и на земјите членки на ЕУ кои треба да го охрабрат Балканот, а не да се овозможи тој да падне во рацете на Ердоган”, заклучи Шиполи.крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Труење во Загреб: неколку студенти завршиле во болница со тешки симптоми

Шест лица вчера попладне побарале итна медицинска помош поради сомнение за труење со храна по оброк во студентската менза на колеџ во Загреб. Станува збор за менза на приватен ресторан, каде што студентите користат субвенционирани оброци, а се наоѓа веднаш до Геодезискиот, Градежниот и до Архитектонскиот факултет, пренесуваат тамошните медиуми.
Сите се препратени на Клиниката за инфективни болести „Д-р Фран Михаљевиќ“, каде што им се укажани лекарски услуги, а две лица поради тешки симптоми се задржани во болница, пренесува „Индекс.хр“.
Подоцна уште едно лице побарало помош, а друго со изразени симптоми одбило лекарска помош.
Поради настанот, на терен излегле службеници од Државниот инспекторат и од Санитарната инспекција, кои извршиле надзор на просторот за обезбедување храна за ученици.
Една студентка за порталот „Средња.хр“ изјавила дека во тоалетот на факултетот наишла на двајца студенти кои повраќале и кои ѝ кажале дека јаделе болоњезе во мензата.
Недолго потоа таа и колешката се упатиле кон мензата, но се откажале бидејќи во студентската група на „Воцап“ пристигнала порака дека на неколку студенти од колеџот не им е добро и дека мензата е затворена.
„Веќе бевме пред мензата, па ги прашавме работниците дали е вистина дека се затворени. Тие рекоа дека не знаат ништо. Тогаш дојдоа сопствениците на ресторанот и почнаа да се правдаат дека сè е во ред, дека меленото месо е свежо, дека мензата неодамна била отворена“, раскажува таа.
Регион
(Видео) Фрлени две рачни бомби врз пошта во Косово, едната експлодирала

Кон зградата на косовската пошта во Звечан, на северот на земјата, ноќеска по полноќ биле фрлени две експлозивни направи, од кои едната експлодирала причинувајќи материјална штета, јавува „Анадолија“.
Косовската полиција соопшти дека е активирана една рачна бомба и дека нема повредени. Експлозијата се случила 20 минути по полноќ.
„Надлежните полициски единици по пристигнувањето на местото на настанот, забележале дека во објектот има уште една неексплодирана граната. Локацијата е обезбедена, а жителите привремено се евакуирани. Специјализирана единица за ракување со експлозивни направи контролирано ја детонирала гранатата“, се наведува во соопштението на косовската полиција.
Регион
Со пиштол напаѓал минувачи: драма во Љубљана

Вооружен маж денеска нападна минувачи во центарот на Љубљана. Со пиштол во рацете притрчал до случаен минувач и барал пари. Успеал да нападне две лица од заседа пред да дојде полицијата и да го одведе.
Како што беше соопштено, станува збор за државјанин на Словенија, кој и претходно бил осуден за слични кривични дела.
„Полицијата рано утринава била известена за грабеж во центарот на Љубљана. Според првичните информации, осомничениот им се заканувал на оштетените на улица и им барал пари заканувајќи им се со пиштол. Едната од жртвите му дала помала сума пари, а потоа пеш побегнал од местото на настанот“, изјави Александра Голец, претставник на полицијата.
Во нападите нема повредени. На местото на настанот биле испратени повеќе патроли, а полицијата по наведениот опис го привела осомничениот и го привела. Кај него пронашле пиштол и украдени предмети.