Регион
Еден убиен и над 290 уапсени во рација на турската полиција против IS и PKK
Еден осомничен е убиен а повеќе од 290 лица се уапсени во големата рација на турската полиција насочена против осомничени припадници на џихадистичката организација Исламска држава (IS) и забранетата Работничка партија на Курдистан (PKK) спроведена во петокот, пренесуваат во саботата турските медиуми.
Во операцијата во којашто низ цела Турција биле ангажирани илјадници полицајци со хеликоптерска поддршка биле извршен претреси и апсења во 16 турски покраина во потрага по членови на Исламската држава и Работничката партија на Курдистан, кои се на листата терористички организации на официјална Анкара, во операцијата којашто започна во раните утрински часови во петокот, објави премиерот Ахмет Давутоглу истакнувајќи дека се уапсени 297 милитанти, кои се припадници и на други илегални екстремни групи и организации покрај споменатите.
Давутоглу ја потврди информацијата од петокот дека во рацијата во истанбулскиот кварт Багчилар е застрелан припадник на забранетата крајно левичарска Револуционерна народна ослободителна партија-фронт (DHKP-C), кој давал отпор при апсењето и притоа отворил оган врз полицајците.
Во западните покраини Измир и Бурса, уапсени се вкупно 16 осомничени милитанти од Работничката партија на Курдистан, пренесе приватната агенција Dogan. Во поркаината Аланија, пак, биле уапсени најмалку две лица од кои еден тинејџер, под сомнение дека се членови на PKK.
Според агенцијата, речиси 5.000 полицајци биле вклучени во рациите извршени на 140 локации во Истанбул, во кои се уапсени најмалку 90 лица, од кои 37 се странски државјани.
Во соопштението што го објави кабинетот на турскиот премиер се потенцира дека тој е решен да се справи со Исламската држава и другите милитантни групи.
Давутоглу потсетувајќи на самоубиствениот бомбашки напад од понеделникот 20-ти јули кога во градот Суруч беа убиени 32 лица, во покраината Шанлиуфра која граничи со Сирија, кој го изврши припадник на Исламската држава тврди дека атентатот се „експлоатира од стана на Работничката партија на Курдистан , како и од маргиналните левичарски терористички организации“.
„Како и во минатото, и денес државата Република Турција е одлучна во својата повеќенасочна борба против трористичките организации Исламска држава и Работничката партија на Курдистан и другите меѓународни терористички организации.. Се преземаат сите мерки за да се обезбеди мирот и безбедноста во нашата земја“, порача Давутоглу.
Додавајќи дека ќе се бори против сите терористички групи „без разлика“, во соопштението на турскиот премиер вели дека симултаните операции се поврзани со „нелегалните демонстрации одржани по инструкции на организации“ и „вооружени напади врз безбедносните сили, што доведе до загинување на пет безбедносни офицери“.
Станува збор за случаите кога двајца полицајци беа пронајдени мртви во југоисточна Турција, во близина на границата со Сирија во средата, за што Анкара го обвинува военото крило на PKK коешто наводно се одмаздувало за бомбашкиот напад во Суруч во кој цел на џихадистите беа курдски активисти кои се подготвуваа да заминат за обнова на Кобане, курдски град во Сирија кој беше разорен од повеќемесечната офанзива на Исламската држава. Друг полицаец беше убиен во југоисточната покраина Дијарберкир, а двајца војници настрадаа во напад на џихадистите врз воен пограничен пункт на границата со Сирија./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Maж падна од опасна карпа на Паг и почина, спасена алпинистка
При искачување на опасна карпа на Паг, еден маж почина, а една жена беше спасена во голема операција на хрватската служба за спасување.
„Добивме пријава во 13 часот и 32 минути дека две лица наводно се качувале на карпа кај Метајна. Едното лице паднало и починало. Другото е на карпата. Засега не може да им се пристапи од копно“, рекоа од полицијата.
Покрај полицијата, на местото на настанот има и други служби за итна помош – брза помош, пожарникари.
Малку по 17:00 часот од карпите е спасена жена, откако спасувачите со чамци се приближиле до карпата од морската страна.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.
Регион
Борел следната недела со лидерите на Западен Балкан
Високиот претставник на Европската Унија (ЕУ), Жозеп Борел, ќе приреди работен ручек за шестмина лидери од Западен Балкан следниот четврток во Њујорк на маргините на Генералното собрание на Обединетите нации, објавено е денеска на веб-страницата на ЕУ, пренесуваат медиумите во регионот.
Во соопштението се наведува дека висока делегација на Европската комисија ќе учествува на 79. сесија на Генералното собрание на ОН следната недела во Њујорк, а фокусот на ангажманот на ЕУ ќе биде ставен на решавање низа невидени конфликти и кризи околу светот.
Делегацијата на ЕУ ќе ја сочинуваат претседателката на Европската комисија, Урсула фон дер Лајен, извршната потпретседателка Маргарет Вестагер, високиот претставник Борел, потпретседателката Дубравка Шуица, како и комесарите Стела Киријакидес, Дидије Рејндерс, Илва Јохансон, Јанез Ленарчич, Јута Урпилаинен, Кадри Симсон и Вопке Хокестра.