Поранешниот претседател на Србија и Црна Гора и политички директор на владејачката црногорска Демократска партија на социјалстите (ДПС), Светозар Маровиќ, во вторник ќе го напушти истражниот затвор во Спуж, откако со Специјалното обвинителство постигнал договор за признавање на вината и затворска казна не помала од четири години, пренесуваат црногорските медиуми.

Маровиќ се обврзал на Обвинителството да му укаже каде завршиле повеќе од 15 милиони евра, за кои била оштетена Општина Будва. Претходно со Обвинителството договор постигнале неговиот син Милош и братот Драган, коишто, исто така, беа во притвор за слични обвиненија.

Високиот функционер на владејачката ДПС, како што пренесуваат црногорските медиуми, практично пред Специјалното обвинителство признал дека е лидер на криминална организација и дека истата ја формирал поради стекнување со противправна имотна корист. Маровиќ веќе пет месеци се наоѓа во затворот во Спуж, а неговата здравствена состојба од ден во ден се влошува, особено откако му биле претставени материјалните докази против него.

Маровиќ поради оваа причина ја потпишал изјавата дека организирал криминална организација од триесетина лица, ги опишал нивните улоги и начин на делување, но го открил и тоа како и преку кои сметки парите „излегле од земјата“. Со ова тој ги потврдил сите сомнежи за кои го товари Обвинителство, а новитет е тоа што спорните пари не стигнале до него, бидејќи како што тврди самиот во таа зделка бил измамен.

Се шпекулира дека во своите признанија Маровиќ укажал на трагата на 15-те милиони евра и дека овие пари преку повеќе компании регистрирани во Црна Гора биле потоа пренесени на повеќе сметки во странство./крај/мф/бс

Извор: Макфакс