Регион
Ердоган во Загреб побара поддршка од Западот преку хуманост и „други видови на помош“
Западот треба да покаже хуманост и да и пружи „други видови на помош“ на Турција, која никогаш нема да ги затвори вратите за бегалците од Сирија, изјави во Загреб турскиот претседател Реџеп Тајип Ердоган.
„Турција никогаш нема да им ги затвори вратите на луѓето кои бегаат од бомбите“, изјави Ердоган по средбата со хрватската претседателка Колинда Грабар-Китаровиќ. Турскиот претседател додаде дека Западот мора поинаку да реагира поради тоа што „се работи за хуманитарна должност“ и дека на Турција треба да и даде „други видови на помош“, без притоа да презицира на што конкретно мисли.
Владата во Анкара претходно истакна дека укинувањето на визите за турските државјани е клучно за успехот на договорот ЕУ-Турција за сопирањето на илегалната миграција во Европа. Грабар-Китаровиќ, пак, даде силна поддршка за приближувањето на Турција кон ЕУ, вклучувајќи и либерализација на визниот режим.
„Има низа подрачја во кои Хрватска може да и помогне на Турција во процесот на евроинтеграциите. Пред се преку политичка поддршка во Брисел и силна поддршка за интеграција на Турција во ЕУ, како и укинувањето на визите, кое се надевам дека ќе се склучи наскоро“, рекла хрватската претседателка.
„Исто така се надевам дека реципрочно ќе бидат укинати и визите за хрватските граѓани кои ќе ја посетуваат Турција“, додала Грабар-Китаровиќ.
Претседателите на Турција и Хрватската исто така ја поддржале и интеграцијата на државите од југоисточна Европа во ЕУ и НАТО, особено Босна и Херцеговина (БиХ), каде како што потенцирала Грабар-Китаровиќ, Турција секогаш играла конструктивна улога./крај/мф/бс
Извор: Hina
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.