Условите и критериумите за напредокот во европските интеграции се целосно јасни и однапред дефинирани, нема никакви нови услови и тоа српските претставници добро го знаат, изјавила за српскиот весник Данас, портпаролката на Европската комисија (ЕК), Маја Коцијанчич, пренесуваат српските медиуми.

Коцијанчич изјавата ја дала како реакција на тврдењата на српскиот министер за надворешни работи Ивица Дачиќ дека пред Србија секогаш ќе се поставуваат некои нови услови за напредок.

Дачиќ минатата седмица изјави дека ниту ЕУ не знае што ќе прави со Србија, и дека земјата „веќе не сака да прифати политика на движечки цели и поставувањето нови услови“.

Коцијанчич истакнала дека Србија доста добро знае што треба да направи во процесот на интеграцијата, односно дека сите услови се однапред познати, а дека целиот процес е транспарентен.

„Цел западен Балкан има европска перспектива, тоа е политиката на ЕУ. Србија е кандидат за полноправно членство, таа е на патот кон ЕУ и напредува во тој процес. Сите услови и критериуми се целосно јасни и однапред дефинирани“, нагласила таа.

„Процесот на европските интеграции е транспарентен. Поради тоа, и од наша страна и од страна на Србија, е добро познато што мора да се направи“, нагласи Коцијанчич./крај/мф/бс