Грчките власти одобриле азил за 800 бегалци на островот Лезбос, и покрај договорот меѓу Европската унија и Турција мигрантите кои доаѓаат во Грција да се враќаат на турска територија, јави во средата атинскиот дневен весник Kathimerini.

Договорот меѓу Брисел и Анкара наложува мигрантите кои пристигнале на грчките острови по 20-ти март да се враќаат назад во Турција, кој се смета за безбедна земја, и таму да можат да поднесат барање за азил во западноевропските земји.

Меѓутоа, како што пишува Kathimerini, многу грчки судови не ја сметаат Турција за безбедно трета земја во којашто мигрантите би можеле да се вратат.

Многумина од оние на кои им е дозволено да останат во Грција се или болни, или се помлади од 18 години, мајки со деца или имаат роднини во западните и северните земји на Европската унија, се додава во написот.

Засега не е познато кога тие 800 мигранти пристигнале во Грција, ниту кога точно им е одобрен азилот. Досега во Грција барање за азил поднеле 8.000 лица и повеќето од нив се сместени на Лезбос.

Од стапувањето на сила на договорот меѓу ЕУ и Турција приливот на беглаци во Грција е во постојано опаѓање. Во првата половина од јуни пристигнувале по помалку од 50 луѓе дневно, според официјалните грчки податоци./крај/мф/сн

Извор: Kathimerini