Регион
Грција погодена од поплави и земјотрес

Грција во петокот навечер и ноќта кон саботата беше зафатена од обилни поројни дождови кои предизвикаа поплави, а во саботата наутро и од земјотрес со магнитуда од 5,2 степени североисточно од главниот град Атина, објавија националниот метеоролошки центар и геодинамичката опсерваторија во Атина.
Грција, особено областа Атика во којашто спаѓа и главниот град, во петокот навечер беше погодена од големи поплави како последица на ураганот Гонзало кои се премести од западна Европа кон југот на континентот. Покрај сообраќајниот застој и хаос на улиците и стотиците интервенции на пожарникарите за извлекување од превртените автомобили и испумпување на вода од поплавените домови, не е забележана ниедна жртва до саботата претпладне, објави Грчкиот метеоролошки центарОсобено од невремето беше погодена атинската периферија Атика, каде што вкупно противпожарната служба примила 600 повици за интервенции. Во саботата наутро е регистриран силен земјотрес со магнитуда од 5,2 степени по Рихтеровата скала, на 249 километри североисточно од Атина. Засега нема пријавено жртви и материјални штети. Епицентарот на земјотресот кој силно бил почувствуван во Епир, лоциран на 20 километри северно од градот Арта, во истоимената префектура кон северниот дел од земјата./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ се огласи од Москва по проблемите со летот

Претседателот на Србија, Александар Вучиќ, денеска пристигна во Москва, каде на аеродромот Внуково го пречека заменик министерот за надворешни работи на Русија, Александар Грушко.
Доаѓањето на Вучиќ во живо го пренесуваше најгледаната руска телевизија „Русија 24“. На Вучиќ му беше договорен свечен пречек.
„После многу години, повторно во Москва. Горд на антифашистичката борба на мојот српски народ и благодарен за огромната помош што ја имавме од Црвената армија за време на ослободувањето на Србија“, напиша Вучиќ на Инстаграм.
Вучиќ околу 11 часот полета од Белград за Москва, каде што треба да присуствува на прославата на Денот на победата на Црвениот плоштад. Авионот привремено слетал во Баку бидејќи немал дозвола за летање поради борбени операции. Откако доби зелено светло, летот продолжи.
Авионот на Владата на Србија во кој се наоѓаше претседателот на Србија, Александар Вучиќ, полета од Баку за Москва околу 14:10 часот по српско време.
Во изминатите неколку дена аеродромите во неколку руски градови беа затворени поради напади на украински беспилотни летала.
Помошникот на претседателот на Русија, Јуриј Ушаков, вчера изјави дека рускиот претседател Владимир Путин на 9 мај ќе има билатерални разговори со српскиот претседател Александар Вучиќ.
На 9 мај во Москва со Парадата на победата ќе се одбележи 80-годишнината од победата над фашизмот во Втората светска војна, а претседателот Вучиќ претходно најави дека и покрај сите притисоци ќе оди во Москва да го прослави Денот на победата и дека гордо ќе ја претставува Србија на 80-годишнината од победата над фашизмот.
Регион
Македонија да не биде жртва на притисоци и да трпи изнуди за ЕУ, порача Милановиќ

Македонија да не биде жртва на притисоци и да трпи изнуди кога е во пршање членството во Европската Унија, порача хрватскиот претседател Зоран Милановиќ кој беше во посета на земјата.
Тој рече дека има премногу насоки од соседите и меѓународните актери за тоа како Македонија да се движи на европскиот пат, но најголемиот дел треба да се земаат со резерва.
„Правилата се јасни. Треба консензус, односно треба едногласност. Како и да свртите ќе дојде на исто. Се додека е некој против, Македонија за жал не може да напредува на тој пат. Единствено прашање е дали е тоа навистина за вас, односно за вашите граѓани најважната работа на овој свет и единствено вредно за живот и напор или постојат други работи за државата кои ја дефинираат како успешна и реализирана заедница“, изјави Милановиќ.
Хрвaтскиот претседател рече и дека Македонија не треба да се третира како земја со посебни потреби, туку како земја која има проблем.
На заедничката -прес-конференција со претседателката, Гордана Сиљановска-Давкова беше потенцирано дека Хрватска е искрен македонски пријател и поддржувач на патот кон ЕУ, близок партнер во НАТО и долгогодишен сојузник.
Регион
Авионот на Вучиќ приземјен во Баку, летот прогласен за небезбеден

Авионот на српскиот претседател, Александар Вучиќ, со кој утрово во 11 часот полета за Москва, е приземјен во Баку и во моментот не може да го продолжи своето патување бидејќи нема дозвола да го продолжи летот поради воените операции меѓу Русија и Украина.
Сите земји претходно дадоа дозвола за летот, но сега не може да ја дадат поради воените операции, јавува репортер на „Танјуг“. Се чека одобрение за продолжување на летот.
Аеродромите во Москва исто така моментно се затворени.
Украина ја нападна Москва со беспилотни летала принудувајќи ги повеќето аеродроми во руската престолнина да се затворат токму кога кинескиот претседател Шји Џјинпинг требаше да пристигне за да ја прослави победата над нацистичка Германија во Втората светска војна.
Во изминатите неколку дена аеродромите во неколку руски градови беа затворени поради напади од украински беспилотни летала.
За потсетување, претходно беше закажано српскиот претседател да има билатерална средба со рускиот претседател Владимир Путин в петок, што беше објавено и од Кремљ.
Според „Спутник“, не е познато кој воздушен коридор го користел Вучиќ за руската престолнина.
На 9 мај Русија ја одбележува 80-годишнината од победата над фашизмот во Втората светска војна со парада на Црвениот плоштад во Москва и со низа други настани. Се очекува да присуствуваат повеќе од 20 светски лидери.