Црногорскиот премиер Мило Ѓукановиќ оцени дека преку последните случувања во Црна Гора се води сериозна стратешка борба „за“ и „против“ ширењето на НАТО на Балканот.

Во интервју за Федералната телевизија на Босна и Херцеговина (БиХ), црногорскиот премиер оценил дека „сите напори на оние кои се против ширењето на НАТО, сега се насочени на просторот на Црна Гора“.

„Тука всушност се води една сериозна стратешка борба, а тоа е борбата на НАТО, кој има амбиции своите вредности да ги шири и натаму на просторот на Балканот, на просторот на Европа, и онаа политика која всушност се противи на натамошното ширење на НАТО и која во ширењето на НАТО гледа опасност по себе“, смета Ѓукановиќ.

Тој додаде дека целта на протестите на опозицискиот Демократски фронт (ДФ) е да се запре патот на Црна Гора кон членството во НАТО и навел дека во тоа тие имаа поддршка од „поблиското и подалечното меѓународно опкружување“.

Во овој контекст, Ѓукановиќ, исто така, ги спомена и „големосрпските кругови од Белград“, кои се собрани околу, како што вели, „одредени општествени центри на моќ, како што е Српската православна црква“.

Црногорскиот премиер наведува дека тие „центри на моќ некогаш биле против независноста на Црна Гора“, а денес „отворено ги поддржуваат протестите во Црна Гора со намера да дојде до смена на власта, потоа преиспитување на државно-правниот статус на Црна Гора, и доколку е можно, Црна Гора да се врати во сферата на влијание и управување на тие големосрпски кругови од Белград“.

Меѓутоа, сепак, додаде дека организаторите на протестите на нападите против сувереноста на Црна Гора, немаат поддршка од официјалната политика на Србија. Црногорскиот премиер оцени и дека официјална Москва, преку соопштението за поддршка на „организаторитен а протестот, ги идентификувала своите цели, а тоа се сопирањето на Црна Гора на патот кон членството во НАТО“. Црна Гора на почетокот на декември очекува и официјална покана за членство во Алијансата.

Ѓукановиќ, исто така, спомена дека секој „кој мисли дека може Балканот да го препушти на некоја алтернатива вон процесот на европските и евроатлански интеграции, го потценува капацитетот за дестабилизација, која никогаш не е само дестабилизација на една држава од Балканот, и тоа претставува дестабилизација на Европа“./крај/мф/бс