Новоизбраниот еврокомесар за соседство и пристапни преговори, Јоханес Хан во вторник во Европскиот парламент (ЕП) ќе го образложи новиот план во однос на политиката на проширувањето на Европската унија (ЕУ).

Хан претходно изјави дека политиката на проширувањето е „мотор на реформите, но на тој начин што секоја земја ќе стане членка на ЕУ само доколку е целосно подготвена за тоа“.

Прием на нови членки во следните пет години нема да има, навел Хан, кој во надворешнополитичкиот одбор на ЕП ќе даде свое видување и за политиката за соседството, која сега е силно фокусирана на украинската криза.

По веќе утврдената постапка, австрискиот еврокомесар веќе однапред одговорил на пет прашања на пратениците од ЕП, потенцирајќи дека за одлучувањето околу влегувањето на одредена земја во ЕУ, „квалитет ќе мора да се гледа пред брзината на процесот“.

Австриецот исто така порачал дека „потребните длабоки реформи можат да се спроведат само постепено, заедно со огромната поддршка од ЕУ“.

Новоизбраниот еврокомесар додал дека „во поглед на клучните поглавја како владеењето на правото, тој е подготвен да го засили политичкиот дијалог и ангажирањето со тие земји, и да се потикнат реформите преку искористувањето на сите можности од европските фондови“.

Според Хан, „независното и професионалното судство е клучно за владеењето на правото, а суштински е важно да се продолжи борбата против организираниот криминал и корупцијата, преку јасни резултати во истрагите, покренувањето на обвиненија и донесувањето на примерни пресуди“.

„Основните права мораат да бидат целосно почитувани во пракса, а не само во законите…преку вклучувањето на малцинските групи во општеството и спречувањето на дискриминацијата, што првенствено ќе биде потенцирано и во нашите годишни извештаи“, објаснил идниот комесар за проширување.

 „Ние мораме да се посветиме првенствено на отворањето на нови работни места, раст, инвестиции и клучни структурни реформи“, изјавил Хан, нагласувајќи дека „поголем дел од средствата од ИПА 2 фондовите ќе бидат насочени кон овие цели, а заедно со меѓународните финансиски организации ќе се работи на поттик на реформите“.

Австрискиот еврокомесар потенцирал дека ќе се работи и на тоа да се поправи начинот на кој ЕУ им помага на земјите кои се подготвуваат за прием, за тие потоа да можат да ги достигнат економските мерила на Унијата./крај/мф/бс