Од утре угостителските објекти во Србија може да примаат гости и во затворените делови. Тие ќе работат до 22 часот, со 50 проценти капацитет и без музика по 18 часот.

„Денес, донесовме одлука кафулињата и рестораните да работат и во затворените делови, но според сите мерки, само до 50 проценти од користењето на просторот, мора да се почитува растојанието помеѓу гостите од еден и пол до два метра, нема да има музика ниту во живо ниту обична по 18 часот затоа што тогаш луѓето викаат за да може да се чујат што зборуваат“, рече епидемиологот Бранислав Тиодоровиќ по седницата на кризниот штаб, објави „Танјуг“.

Тој рече дека кога ќе има помалку од 100 заразени на дневно ниво, ќе може сè да работи нормално.

Црна Гора е земја која е најмногу проруски ориентирана од сите членки на НАТО, покажа истражувањето на институтот „Глобсек“ од Братислава.

Студијата се занимава со влијанието на Русија врз земјите од Централна и Источна Европа и Западен Балкан. Резултатите од извештајот се базираат на анкети на јавното мислење, а анкетирано е населението на Македонија, Бугарија, Чешка, Унгарија, Црна Гора, Полска, Романија, Србија и Словачка.

Граѓаните на Македонија имаат многу мала перцепција дека Русија е закана. По Србија, Северна Македонија најмногу верува дека Русија е најсилната светска велесила, додека две третини од населението негува чувство на поврзаност со Русија преку словенското братство. Една третина од граѓаните сметаат дека НАТО е одговорен за докажување на Русија и дека Западот неправедно ја обвинува Русија за разни дела, се наведува во истражувањето.

Црна Гора е земја која е најмногу проруски ориентирана од сите членки на НАТО, покажа истражувањето.  Според истражувањето, мнозинството граѓани на Црна Гора сметаат дека Русија е братска земја, поради што ја прифаќаат реториката што ја претставува Русија како жртва.

Според наодите на „Глобсек“, поддршката на Црна Гора за Запад е 35 проценти, додека 25 проценти од испитаниците се ориентирани кон Исток, што е убедливо најголем процент од сите земји опфатени со истражувањето.

Младите во Македонија, како и нивните врсници од Црна Гора, Србија и Унгарија, честопати ја гледаат Русија како стратешки партнер.

„Објаснувањето е веројатно во фактот дека тие (младите) се родени значително по завршувањето на комунизмот, поради што тие почесто стануваат жртви на проруската и антизападната политика. Граѓаните на Црна Гора, 38 проценти од нив, веруваат дека Русија е најважниот стратешки партнер. Од сите девет земји во кои беше спроведено истражувањето, 59 проценти од граѓаните на Србија ја гледаат Русија како доминантен партнер“, се вели во извештајот на „Глобсек“.

Хрватскиот министер за надворешни работи Гордан Грлиќ Радман изјави денеска во Приштина дека Хрватска го поддржува дијалогот меѓу Белград и Приштина и се спротивставува на каква било промена на границите во Источна Европа и најави дека неговата земја ќе формира воен камп на Косово, заради поголема безбедност.

„Ние го поддржуваме билатералниот дијалог меѓу Косово и Србија и се надеваме дека ќе се најде решение“, рече Гордан Грлиќ Радман на заедничката прес-конференција со косовскaта министерка Доника Грвал, додавајќи дека тој исто така поддржува укинување на визите за ЕУ ​​за жителите на Косово.

„Одлучивме да формираме воен камп на Косово што ќе придонесе за стабилност. Хрватска неодамна одлучи да го зголеми својот воен контингент во рамките на мировната операција на НАТО на Косово – КФОР, а операцијата на КФОР е од особено значење за Хрватска, бидејќи е во нашето непосредно соседство што може да има посебни импликации врз стабилноста на целиот регион “, рече Радман.

Според РТС, Радман додаде дека „Хрватска и Косово се традиционално две пријателски земји кои имаат многу добри односи“, потсети дека Хрватска е меѓу првите што ја призна еднострано прогласената независност на Косово и најави дека Хрватска ќе донира 10.000 вакцини против коронавирус на Косово.