Косовската влада ќе биде формирана од коалиција на три албански партии – Демократскиот сојуз на Косово (ДСК), Алијансата за иднината на Косово (АЗБК) и Иницијативата на Косово, со поддршка од српското и останатите малцинства, изјавил лидерот на АЗБК, Рамуш Харадинај за RTK2.

Харадинај додал дека косовската влада ќе биде формирана без оглед на одлуката на Уставниот суд и изразил уверување дека тој ќе биде на чело на оваа влада, чие формирање се очекува кон средината на септември.

„Каква и да е таа одлука, нема да го промени политичкиот правец на Косово. ДСК, АЗБК, Иницијативата на Косово, потоа српската листа и останатите заедници – Турци, Бошњаци, Роми, Ашкалии, Египќани и веќе избраните пратеници во Собранието, вклучувајќи ги и „Самоопределување“, сметаат дека е доста од владите на Тачи“, изјавил Харадинај, отфрлајќи ја можноста за организирање на нови избори, бидејќи како што вели, „никој нема време за тоа“.

Харадинај се осврнал и на продолжувањето на дијалогот со Белград, но со нови цели.

„Имаме некои цели кои сакаме да ги постигнеме преку тој дијалог. Успеавме на 19 април да постигнеме договор, но многу работи се случија и мораме како земја билатерално да имаме дијалог. Целта е еден ден Косово и Србија меѓусебно да се признаат и сите да одиме по европскиот пат“, рекол Харадинај./крај/мф/бс