Хрватска ги поканила сите членки на НАТО да учествуваат во Загреб на парадата која ќе се одржи на 4-ти август, по повод 20 години од операцијата „Бура“, а поканата веќе била прифатена од страна на војските на Германија и Велика Британија, пишува Вечерње новости.

Весникот наведува дека се очекува и пристигнување на американски борбени авиони Ф-16 и хеликоптери „Црн сокол“, потоа авиони од составот на англиското воздухопловство, како и борбени авиони од Чешка и Унгарија, кои би требало да прелетаат преку Загреб.

Од главниот штаб на вооружените сили на Хрватска за весникот изјавиле дека секојдневно стигнуваат пријави од странски земји за учество на парадата, но организаторите засега не сакаат да откријат кој се ќе дојде во Загреб.

Српскиот министер за надворешни работи Ивица Дачиќ на 7-ми јули изјавил дека Србија со внимание ќе следи кои земји ќе испратат војска на парадата во организација на Хрватска а по повод 20-годишнцата од операцијата „Бура“, и дека нивното учество ќе се смета како за антисрпски став.

За телевизијата Н1 Дачиќ рекол дека на Србија и се замерувало поради тоа што испратиле војска на воената парада во Москва, на одбележувањето на победата над фашизмот, а дека сега на парадата која Хрватска ја организира по повод операцијата „Бура“,  во која беа убиени повеќе илјади и протерани стотици илјади Србија, се поканети и војски на некои други земји.

„Учеството на нивните војски на парадата ќе има доста јасна негативна порака кон Србија. Ние тоа ќе го сметаме како антисрпски став“, нагласил шефот на српската дипломатија.

Советникот на српскиот претседател Томислав Николиќ пак, Иван Мркиќ за Новости изјавил дека изјавата на Дачиќ е сосема оправдана.

„Србија внимателно ќе следи на кој начин нашите соседи, но и останатите држави, ќе земат учество во планираните манифестации во Загреб и која порака ќе биде испратена. Србија и Хрватска имаат целосно различни гледишта на „Бура“, за нас тоа е симбол на страдањето на српскиот народ“, рекол Мркиќ./крај/мф/бс