Хрватскиот претседател Иво Јосиповиќ порачал дека Загреб нема да ги кочи соседните земји во патот кон Европската унија (ЕУ), и го оценил доаѓањето на германската канцеларка Ангела Меркел на состанокот на лидерите југоисточна Европа, на 15 јули во Дубровник, како потег што ја покажува поддршката за проширувањето на ЕУ.

Во интервју за  белградски Новости, во пресрет на третиот состанок од „Брдо Бриони“ процесот, на кој ќе се разговара за проширувањето на ЕУ, Јосиповиќ рекол дека доаѓањето на Меркел значи дека ЕУ сака да продолжи со ширењето со земјите од Западен Балкан.

Јосиповиќ потенцирал дека хрватскиот Парламент донел декларација „со која јасно се говори за тоа дека соседите нема да биде уценувани и блокирани во нивните напори да влезат во ЕУ“, но навел дека решавањето на отворените прашања ќе биде важно за оценката околу исполнувањето на условите.

„Притоа не мислам дека Хрватска би ги уценувала соседите, туку дека способноста за решавањето на отворените прашања со соседите ќе биде важен тест за сите нас“, рекол Јосиповиќ.

Хрватскиот претседател рекол дека главната порака на собирот во Дубровник ќе биде дека „ЕУ го смета целиот регион за дел од Европа и иднината на сите земји од регионот е во ЕУ“.

„Нормално, кандидатите ќе морат да исполнат сериозни услови. Разговорите за заедничките напори за изградбата на инфраструктурата, европската енергетска политика и местото на југоисточна Европа во неа, како и прашањата за соработката во регионот, се јасен знак за таквиот политички став“, оценил Јосиповиќ.

Јосиповиќ додал дека „политиката на добрососедство и свеста за потребата од соработка, особено во сообраќајната и енергетската инфраструктура, се вклопува во очекувањата на Европа“./крај/мф/бс