Регион
Истанбулските напаѓачи биле Русин, Узбек и Киргиз

Тројцата бомбаши самоубијци кои во истанбулскиот меѓународен аеродром „Мустафа Кемал Ататурк“ во вторникот вечерта убија според последните информации 43 луѓе, биле од Русија, Узбекистан и Киргистан, изјави во четвртокот претставник на турската влада.
Нападот врз третиот најфреквентен аеродром во Европа беше најсмртоносниот во серијата бомбашки акции во Турција од почетокот на годинава.
Медиумите објавија дека претставник на турската влада ги навел само државјанствата на бомбашите самоубијци, но не и нивниот идентитет
Весникот Milliyet, пак, повикувајќи се на свои извори во истрагата пишува дека сите тројца бомбаши биле државјани на Таџикистан.
Според телевизијата Habertürk еден од напаѓачите бил идентификуван како државјанин на Русија Сман Вадинов, за што нема официјална потврда. Тој наводно потекнувал од немирната кавкаска република Чеченија, и во Турција дошол од сирискиот град Рака, кој е главниот град на самопрогласениот „калифат“ на џихадистичката организација Исламска држава.
Нападот на аеродромот во Истанбул, инаку, беше изведен точно на денот кога пред две години Исламската држава го прогласи својот калифат на големите територии кои ги контролираше во Сирија и соседен Ирак.
Турската полиција во четвртокот утрото уапси 13 лица меѓу кои тројца се странци во врска со нападот. Безбедносните сили извршиле симултани рации на 16 локации, во три квартови на Истанбул и три кварта во Измир, каде и се сите приведени. Тие се доведуваат во врска со финансирање, логистика и врбување борци за Исламската држава.
За нападот сé уште ниедна организација не ја презема одговорноста, меѓутоа меѓународните експерти за тероризам се еднодушни дека тој ги носи сите обележја на Исламската држава./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Успеавме да ги одложиме санкциите на САД врз српската нафтена индустрија

Српскиот претседател Александар Вучиќ денес изјави дека САД го одложиле воведувањето санкции против Нафтената индустрија на Србија (НИС) за осум дена со цел, како што рече, „за да покажат почит кон Србија“.
„Им благодарам, сакаа да покажат почит, да ни кажат дека нè слушаат и ја разбираат нашата позиција. Благодарам за тоа, но дали добивме нешто суштинско? За седум дена, ќе го имаме истото прашање, а јас сè уште нема да го имам одговорот“, рече Вучиќ во Обреновац, каде што учествуваше на граѓанскиот марш против блокадите.
Тој додаде дека ќе има реакција од Србија и од самата НИС и кон американската страна и кон другите партнери кога станува збор за нови понуди.
„Верувам дека ова е добро, но дали ќе биде доволно и дали ова е она што го сакаат Американците – ќе видиме“, рече Вучиќ.
Санкциите на САД против НИС требаше да стапат во сила на 1 октомври, но рокот сега е одложен барем до 9 октомври.
фото: принтскрин
Регион
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Регион
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.