Двајца притвореници од затворот Гвантанамо на Куба ќе бидат префрлени во Србија, соопштил Стејт департментот, изразувајќи благодарност кон Србија поради „великодушната помош“, пренесуваат српските медиуми.

„САД се благодарни поради тоа што Србија понуди хуманитарно преместување на двајца притвореници од американскиот притвор во Гвантанамо беј на Куба“, истакнале од Стејт департментот. Американското министерство за одбрана го објавило трансферот на Таџикистанецот Мухамадиј Давлатов и јеменскиот државјанин Мансур Ахмад Саад ал-Дафи, се наведува во соопштението.

Од Стејт департментот додале дека САД доста ја ценат „великодушната помош на Србија во моменти кога Вашингтон настојува со напорите да го затвори притворот во Гвантанамо беј“. „Овој значаен хуманитарен гест е во согласност со лидерската улога на Србија на глобалната сцена“, наведува Стејт департментот.

Ова е првпат во Србија да се испратат притвореници од Гвантанамо, каде после овој трансфер ќе останат 76 притвореници. Стејт департментот напоменува и дека секој трансфер е едногласно одобрен од министерствата и агенцијата на американската влада, а дека Србија се придружила на група од 30 земји кои од 2009-та година дале можност за преместување на преку 100 притвореници.

Американското министерство за одбрана навело дека САД се координирало со владата на Србија за трансферот да биде во согласност со безбедносните мерки и хуманиот трансфер на затворениците. The New York Times пишува дека ова се првите притвореници од Гвантанамо кои се префрлени во Србија, а од 76-те притвореници кои остануваат во затворот на Куба, 27 се на списокот за трансфер.

Двајцата затвореници кои се префрлени во Србија се уапсени на крајот на 2001-та година за време на војната во Авганистан и предадени на војската на САД која ги држеше во притвор без судење повеќе од 14 години, пишува њујоршкиот весник, кој наведува дека поинакви имиња на притворениците, од оние кои биле соопштени од страна на американската влада.

Според пишувањата на весникот, јеменскиот притвореник некогаш „веројатно бил војник од низок ранг поврзан со Ал-Каеда“, но го променил начинот на размислување во затворот, научил англиски и завршил курсеви потребни за да заврши средно училиште.

Вториот притвореник е државјанин на Таџикистан, кој чекал на трансфер од 2009-та година кога затворските власти заклучиле дека претставува доволно ниска закана, со што може да биде префрлен во некоја безбедна земја. Тој останал на Гвантанамо поради тоа што било заклучено дека не може безбедно да биде вратен во својата земја, пишува The New York Times./крај/мф/бс

Извор: Макфакс