Хрватска не ја блокира Србија на патот кон европските интеграции, туку и помага да се трансформира и да стане зрела за членство во Европската унија (ЕУ), а тоа е долгорочна корист за односите меѓу двете земји, изјави во понеделникот во Варшава хрватскиот министер за надворешни работи Миро Ковач, пренесуваат хрватските медиуми.

Одговарајќи на прашање дали Хрватска ја блокира Србија на патот кон ЕУ, Ковач потсетил дека Србија формално ги започна преговорите за членство во јануари 2014-та година, а првите две преговарачки поглавја беа отворени дури во декември 2015-та.

„Знаете ли зошто? Се работеше за Косово. Германија и Велика Британија инсистираа Србија да отвори дијалог и воспостави односи со Косово. Дали сте слушнале некој во Србија или во ЕУ да говори за блокада кон Србија? Секако дека не сте слушнале“, рекол Ковач, говорејќи на трибината „Хрватска – најмладата членка на ЕУ“.

„Хрватска ѝ помага на Србија да ги исполни критериумите кои се клучни за најважното поглавје во преговорите, а тоа е поглавјето кое се однесува на правосудството, фундаменталните права и слободата. Хрватска има доста пријателски пристап“, нагласил хрватскиот министер, додавајќи дека холандското претседателство со ЕУ има амбиции поглавјето 23 од преговорите со Србија да биде отворено во јуни, но дека „Хрватска сака некои работи да се вклучат во преговарачките мерила“.

Ковач исто така се осврнал и на бегалската криза низ која поминува Европа и нагласил дека ЕУ треба да осмисли единствена стратегија по ова прашање. Хрватска воспоставила добра соработка со соседните земји, Австрија, Словенија, Србија и Македонија, а ова придонело, заедно со договор меѓу ЕУ и Турција, за забавување на доаѓањето на бегалците од Блискиот Исток по т.н. балканска рута и ја ублажило бегалската криза./крај/мф/бс