Германската канцеларка Ангела Меркел нема во сабота да отпатува за Турција на отворањето на центарот за прифаќање бегалци како што најави Анкара, соопшти во средата германската влада, во период додека траат полемиките за телевизиските емисии во кои е исмејуван турскиот претседател.

„Последните денови и седмици десетина пати ме прашаа за таа посета на 16-ти април и ниеднаш не го потврдив тоа патување. Така и ќе остане. Во сабота, на 16-ти април, канцеларката нема да патува за Турција“, изјави портпаролот на германската влада Штефан Зајберт на редовната прес-конференција.

Зајберт притоа не даде никакво образложение, а агенциите потсетуваат дека турскиот премиер Ахмет Давутоглу изјави дека на 16-ти април „европските челници и Меркел“ во Килис, на југот од Турција, ќе го отворат центарот за прифаќање на бегалците.

Германските власти досега ниту ја потврдуваа, ниту ја негираа посетата на канцеларката Ангела Меркел на Килис, кој неретко е цел на гранатирања од територијата на соседна Сирија, забележува AFP.

Оваа информација доаѓа во моментите кога германско-турските односи се затегнати последните седмици поради две германски телевизиски сатири насочени против турскиот претседател Реџеп Тајип Ердоган. По емитувањето на првата во која се критикува односот на турскиот претседател Ердоган кон медиумите, но и неговото живеење во наводен раскош, беше прикажан како беше повикан германскиот амбасадор во Анкара, а по втората во којашто тој е прикажан како педофил и зоофил, турската влада побара кривичен прогон за хумористот Јан Боемерман.

Германската влада мора деновиве дали го одобрува прогонот на хумористот поради „навредување претставник на странска држава“, за што Боемерман може да добие три години затвор. Хумористот во меѓувреме и самиот призна дека неговата сатирична песна во којашто се навредува Ердоган, го крши германскиот закон.

Меркел најави дека одлуката за кривичниот прогон ќе биде донесена независно од целите на соработката со Турција поради намалувањето на имигрантите во Европската унија, откако некои медиуми објавија дека канцеларката се наоѓа во непријатна позиција, бидејќи стравува од нови уцени од Анкара. Покрај тоа, во вторникот во подолго излагање таа инсистираше на неопходноста од почитување на „слободата на говорот, мислењето и академските слободи“ како темелни вредности./крај/мф/сн

Извор: Макфакс