Регион
Мустафа Акинџи избран за нов претседател на кипарските Турци
Мустафа Акинџи, кандидат од левиот центар, избран е во неделата во вториот круг од претседателските избори во меѓународно непризнатиот турски дел од островот за челник на кипарските Турци, победувајќи го досегашниот шеф на државата Дервиш Ероглу, пренесуваат агенциите.
Мустафа Акинџи важи за искусен политичар кој се залага за помирување со кипарско грчкиот дел од островот, кој е единствено меѓународно признат по поделбата на овој медитерански остров во 1974 година. Тој добил 60,50 отсто гласови во вториот круг од претседателските избори. Неговиот главен противник, Дервиш Ероглу, освоил 39,50 отсто од гласовите. Одѕивот на гласачите бил висок и изнесувал 64,12 отсто, според податоците на изборната комисија, иако е понизок од претходните избори во 2010 година, кога изнесуваше 75 отсто.
Интересно е што првпат официјална Анкара не поддржа ниеден од кандидатите. Во првиот круг од изборите пред една седмица Ероглу освои 28,18 отсто, додека Акинџи 26,92 отсто од гласовите.
Акинџи, 68-годишен архитект роден во Лимасол, кој во 1976 година на 29-годишна возраст стана градоначалник на турскиот дел од поделената Никозија, во текот на политичката кариера беше и пратеник и вицепремиер, а ова беше третпат да се кандидира за претседател. Нему како претседател на земјата која е признаена само од Турција, главната задача и улога ќе му биде да ги води преговорите со властите на грчкиот дел за обединување. Преговорите треба да бидат продолжени во мај, според неодамнешните најави на специјалниот пратеник на ОН за Кипар.
Со стапувањето на највисоката должност во Турската Република Северен Кипар (TRNC), ќе се обиде да ги заживее мировните преговори, кои запнаа во октомври, со властите на јужниот дел од островот, кој е членка на Европската унија. „Претходните генерации од двете заедници многу патеа. Да сториме нешто за идните генерации да уживаат во богатството на овој остров“, изјави во текот на кампањата. Акинџи за симбол на својата кандидатура ја одбра маслиновата гранка, симбол на мирот.
Турски Кипар опстојува со помош на Турција чиишто брегови се на само 80 километри оддалеченост. За остатокот од светот тоа е зона којашто Анкара ја анектирала во 1974 година како одговор на државниот удар на грчките националисти во настојувањата овој медитерански остров да го присоединат на Грција. Станува збор за 37 отсто од вкупната територија на Кипар на којашто во 1983 година беше прогласена Турската Република Северен Кипар.
Околу илјада војници со мандат на Обединетите нации ја надлгедуваат ткн „зелена линија“ која го сече островот од исток кон запад, а повеќе десетици илјади турски војници се распоредени во северен Кипар.
Во моментот кога турската и грчката страна се подготвуваат за враќање на преговорите под покровителство на 25-то специјален претставник на ОН за кипарското прашање, норвешкиот дипломат Еспен Барт Еиде, овие избори се сметаа за многу важни. Имено, во текот на изминатите 41 година, колку што траат обидите за решавање на кипарското прашање, островот сместен меѓу Средоземјето и Блискиот исток станува се’ поважен, како поради својата геостратешка поставеност, така и поради неодамна откриените резерви од нафта и природен гас во неговите води./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.