Најмалку 50 лица се повредени а едно постаро лице починало од повреди во две експлозии кои одекнаа пред почетокот на предизборниот митинг за парламентарните избори на 7-ми јуни во организација на Демократската народна партија (HDP) во југоисточната покраина Дијарбекир, на турски Курдистан, пишуваат во петокот локалните медиуми.

Министерот за здравство, Мехмет Мујезиноглу изјави дека „околу 50 лица се повредени, а 20 до 24 се хоспитализирани“ по инцидентот.

Според првичните сознанија експлодирал трансформатор, меѓутоа дневниот весник Hurriyet пишува дека министерството за енергетика го отфрлило тврдењата дека инцидентот е предизвикан од неисправност на трансформатор, додека копретседателот на HDP, Селахатин Демирташ кој бил на 30 метри од експлозијата, инцидентот за CNNTürk го карактеризирал како провокација и ги повикал приврзаниците на неговата партија да останат смирени и да заминат пред партиската канцеларија каде што ќе го одржи говорот.

Едната експлозија била во трансформаторот, а втората била предизвикана од експлозивна направа подметната во контејнер за ѓубре, пишуваат дел од локалните медиуми. Масата луѓе собрана на плоштадот започнала во паника да бега, пренесува натаму CNNTürk.

Планирано било Демирташ, чии јавно настапи инаку се многу популарни во Дијарбекир, да се обрати пред неколку десетици илјади негови приврзаници. Но кусо пред почетокот на неговиот говор околу 18.30 часот по локално време одекнале експлозиите.

Во експлозиите еден човек ја загубил раката, а друг починал на самото место. Потоа разгневените поддржувачи на Демирташ се растуриле по улиците на Дијарбекир извикувајќи непријателски слогани против власта и кинејќи ги плакатите на владејачката Партија на правото и развојот (AKP), на турскиот претседател Реџеп Тајип Ердоган.

На неколку места во градот избиле судири со полицијата, којашто за смирување на ситуацијата употребила водени топови и солзавец. Дел од градот поради експлозијата на трансформаторот останал без снабдување со струја, а областа ја надлетува полициски хеликоптер, јавуваат медиумите.

Некои турски медиуми пренесуваат дека причината за двете силни детонации во интервал до пет минути, можеби, е неисправност на мрежата за дистрибуција на електричната енергија. Сепак, министерот за енергетика, Танер Јилдиз, ги отфрли тврдењата за неисправност. „Имало надворешна интервенција на трансформаторот“, рекол, пренесува Hurriyet.

Турскиот премиер Ахмет Давутоглу, пак, веди дека ќе бидат приведени сите лица кои се одговорни за експлозиите. „Ќе испитаме дали станува збор за експлозија во трафостаницата или за атентат, или некој друг вид провокација, и што е можно поскоро ќе ги објавиме резултатите од истрагата“, порачал премиерот. „Како што во минатото беа фатени извршителите на нападите врз HDP, така и сега ќе ги фатиме“, додал Давутоглу.

Партијата HDP се бори да го мине изборниот праг од 10 отсто за да може да има свои претставници во турскиот парламент. Доколку тоа го постигне, тоа би ја оневозможило владејачката AKP да има апсолутно или двотретинско мнозинство. Со тоа партијата на Ердоган нема да може да прави уставни промени и промени на парламентарниот систем на Турција во претседателски, со кој претседателот Ердоган би ја добил и извршната власт./крај/мф/сн

Извор: Макфакс