Српскиот претседател Томислав Николиќ изјави дека не е голем оптимист по разговорите со германскиот министер за надворешни работи, Франк Валтер Штајнмаер, пренесуваат српските медиуми.
 

Српскиот претседател Томислав Николиќ изјави дека не е голем оптимист по разговорите со германскиот министер за надворешни работи, Франк Валтер Штајнмаер, пренесуваат српските медиуми.

Николиќ изјави дека не е оптимист, поради тоа што од Штајнмаер не слушнал дека поглавјата во преговорите со ЕУ ќе бидат отворени до крајот на оваа година.

„Не можам да кажам дека господинот Штајнмаер јасно рече оти преговарачките поглавја ќе бидат отворени до крајот на годината. Но тој рече дека мисли оти ќе се создадат услови за тоа во текот на годината“, изјави Николиќ за Вечерње новости.

Запрашан што конкретно бара Берлин од Белград, кога се работи за Косово, Николиќ вели дека тоа е целосната примена на Бриселскиот договор.

Тој истакнува дека на Штајнмаер му пренел дека Бриселскиот договор подразбира и формирање на Заедницата на српските општина и дека со договорот не е предвидено нејзиното конституирање „да се доведе во врска со приштинското законодавство, како ни да биде во согласност со српското“.

„Зошто ние да го отфрлиме српското законодавство и да се водиме само по она што го пишува во законите на Приштина? Па и тие нека променат некој закон, кога веќе преговараме околу тоа“, порачува Николиќ.

На прашањето дали германскиот министер го поставил признавањето на Косово како услов, српскиот претседател тврди дека Штајнмаер порачал оти „не постои ниеден услов кој се однесува на признавањето на Косово, а кој влијае врз отворањето на поглавјата“./крај/мф/бс